32:584  conioints  a  sa  parole,  et  par  maniere  de  dire,  confits  la  dedans  comme  en  leur  sel:  ou  autrement  nous  n'en  sentirons  point  un  tel  goust,  que  nous  les  puissions  appliquer  a  tel  usage,  pour  fonder  une  vraye  certitude  de  foy  en  luy.  Or  David,  ayant  use  d'une  telle  preface,  adiouste,  Seigneur  donc,  appren-moy  de  bien  iuger  et  entendre:  car  i'ay  creu,  dit-il,  a  ta  parole.  Yci  David  demande  que  Dieu  luy  donne  une  bonne  prudence,  qu'il  cognoisse  ce  qu'il  a  a  faire.  Et  pourquoy?  Il  amene  la  raison  :  et  cest  celle  que  nous  avons  desia,  veue,  I'ay  creu,  dit-il,  a  ta  parole.  Or  il  semble  bien  que  ceux  qui  ont  creu  soyent  assez  enseignez,  qu'ils  ayent,  di-ie,  un  vray  scavoir,  une  prudence  telle,  qu'ils  n'ayent  pas  besoin  de  requerir  a  Dieu  qu'il  les  illumine  plus.  Ou  est-ce  que  consiste  toute  nostre  sagesse,  sinon  en  la  foy,  quand  nous  recevons  la  parole  de  Dieu,  et  qu'estans  enseignez  par  icelle  nous  acquiescions  a  ce  qu'il  nous  dit?  Voyla  toute  nostre  perfection.  Or  David  proteste,  qu'il  a  creu  a  la  parole  de  Dieu:  pourquoy  donc  est-ce  qu'il  demande  d'estre  instruit,  comme  s'il  estoit  rude  et  ignorant?  Or  il  nous  faut  noter  (comme  nous  avons  aussi  touche  ce  matin)  que  nous  croyons  doublement  a  la  parole  de  Dieu:  c'est  a  dire,  la  foy  a  deux  parties:  cependant  ce  n'est  pas  quelle  soit  divisee,  qu'on  la  puisse  desmembrer:  mais  on  peut  distinguer  ce  qui  est  compris  en  sa  nature.  Par  ou  donc  est-ce  que  la  foy  commence?  C'est  de  disposer  a  recevoir  tout  ce  que  Dieu  dira,  que  nous  luy  attribuyons  une  telle  authorite,  que  nous  souffrions  quil  soit  maistre,  que  nous  scachions  que  tout  ce  qui  procede  de  luy,  est  bon,  et  sainct  et  iuste:  devant  qu'il  ait  parle  a  nous,  que  desia  nous  soyons  preparez  et  disposez  a  luy  obeir  :  encores  que  nous  ne  cognoissions  point  sa  volonte,  toutesfois,  que  nous  ayons  cela  resolu  en  nousmesmes,  Dieu  parle-il?  il  faut  que  non  seulement  nous  luy  prestions  audience,  et  soyons  attentifs:  mais  tjue  nous  recevions  sans  contredit,  tout  ce  qui  sera  sorty  de  sa  bouche  sacree.  Voyla  quelle  est  la  premiere  partie  de  la  foy.  Or  il  y  a  une  seconde  partie,  c'est  ascavoir,  l'instruction  que  Dieu  nous  donne  apres  que  nous  sommes  venus  a  luy  en  telle  humilite  que  doyvent  faire  escoliers  a  leur  maistre:  car  nous  sommes  enseignez  plus  a  plein  de  luy.  C'est  ce  que  David  demande.  Il  proteste  donc  d'avoir  creu  a  la  parole  de  Dieu  :  c'est  a  dire,  d'avoir  cognu  la  maieste  qui  est  contenue  en  icelle,  d'y  avoir  obey,  et  de  s'estre  rendu  suiet  a  icelle.  Ayant  fait  une  telle  protestation,  Seigneur,  dit  il,  maintenant  que  i'ay  senty  la  vertu  de  ta  parole,  et  l'ay  desiree  sur  tout,  fay-moy  ceste  grace,  que  ie  la  puisse  comprendre.  Or  voyci  un  beau  passage,  et  bien  digne  d'estre  note.  Car  en  premier  lieu  nous  sommes  advertis  que  iamais  nous  ne  profiterons  ni