40:583  583  PRAELECTIONES  584  igitur  mirum  est,  si  Daniel  voluerit  impedire  hanc  saevitiam,  quantum  in  se  erat.  Sequitur  postea.  25.  Tunc  Arioch  cum  festinatione  introduxit  Danielem  ad  regem,  et  sic  loquutus  est  ei,  Inveni  virum  ex  filiis  captivitatis  Iehudah,  qui  interpretationem  regi  notam  faciet.  Posset  hic  moveri  quaestio,  quomodo  Arioch  loquatur  quasi  de  re  nova,  ubi  Danielem  coram  rege  producit.  Iam  enim  petierat  Daniel  a  rege  (quemadmodum  vidimus)  ut  sibi  daretur  tempus  ad  orandum.  Cur  ergo  Arioch  nunc  iactat  se  reperisse  virum  ex  captivis  Iehudah,  quasi  verba  faceret  de  homine  obscuro  et  incognito?  Sed  fieri  potest,  ut  Daniel  impetraverit  tempus  illud  ab  Arioch.  Scimus  enim  ex  historiis,  quam  difficiles  fuerint  accessus  ad  reges  illos.  Putabant  enim  quodammodo  profanari  suam  maiestatem,  si  comes  se  et  humanos  praeberent.  Est  igitur  probabilis  illa  coniectura,  Arioch  fuisse  internuntium,  quum  rex  tempus  concessit  Danieli.  Vel  poterimus  etiam  dicere,  non  referri  simpliciter  verba  ipsius  Arioch,  sed  Danielem  ostendere  qualis  sit  iactantia  in  hominibus  aulicis,  qui  semper  officia  sua  commendant,  et  ornant  splendore  verborum.  Reducit  igitur  Arioch  regi  in  memoriam,  quod  ipse  inciderit  in  Danielem,  et  tandem  adeptus  sit  quod  rex  ipse  vehementer  optaverat.  In  hoc  igitur  non  admodum  laboro,  quia  vel  tunc  Arioch  clarius  exposuit  regi,  Danielem  esse  qui  posset  interpretari  somnium:  vel  coniunxit  quod  prius  actum  fuerat:  sive  hoc  Daniel  coram  impetraverat,  sive  ipse  petierat  a  rege,  ut  Danieli  tempus  aliquod  daretur.  Ponit  filios  transmigrationis,  vel,  captivitatis,  more  usitato  scripturae,  pro  captivis:  quanquam  nomen  hoc  est  collectivum.  Nunc  sequitur,  26.  "Respondit  rex  et  dixit  Danieli  cuius  nomen  (erat)  Baltesazzar,  Estne  tibi  facultas  ad  notificandum  (ad  declarandum)  mihi  somnium  quod  vidi,  et  interpretationem  eius?  Rex  utitur  his  verbis,  quia  iam  desperaverat  de  interpretatione:  quum  videret  magos  omnes  destitui  hac  in  parte  iudicio  et  intelligentia.  Hoc  autem  iam  persuasum  ei  fuerat  nullam  esse  sapientiam  nisi  in  magis.  Quum  ego  frustra  illos  rogasset,  vix  potuit  aliunde  quidquam  melius  sperare,  quod  errore  illo  (quemadmodum  dixi)  imbutus  erat.  Per  admirationem  ergo  hic  sciscitatur  quasi  de  re  impossibili,  Eritne  tibi  facultas?  Nec  dubium  est  quin  Deus  expresserit  superbo  regi  hanc  interrogationem,  quo  illustrior  esset  sua  gratia  in  Daniele.  Quo  igitur  minus  spei  fuit  in  rege  ipso,  eo  plus  fuit  in  revelatione  ipsa  et  dignitatis  et  reverentiae: