49:581  581  PREMIER  SERMON.  1.  COR.  Chap.  X  v.  1.5.  Nous  sommes  contens  que  tousiours  on  nous  pardonne  en  nos  infirmitez,  et  chacun  aussi  appete  de  s'y  nourrir,  et  sommes  faschez  quand  on  nous  pieque  pour  nous  amener  a  une  droite  perfection:  et  cependant  toutesfois  nous  voudrions  faire  a  croire  qu'il  n'y  a  que  redire  en  nous,  et  que  nous  sommes  parfaits  et  accomplis.  Voyla  comme  les  hommes  d'un  coste  sont  lasches:  cependant  ils  sont  enflez  d'une  fole  presomption.  Par  une  vaine  gloire  ils  voudroyent  bien  passer  les  nues,  mais  ils  ne  veulent  pas  lever  un  pied  de  la  terre,  quand  il  est  question  d'approcher  de  Dieu  a  bon  escient  et  a  ia  verite.  Or  ce  vice-la  est  par  trop  commun.  Et  pourtant  il  nous  faut  penser  au  remede,  voyant  qu'il  n'y  a  celuy  de  nous  qui  n'en  soit  entache.  Et  c'est  co  que  sainct  Paul  a  pretendu  en  tout  ce  qui  nous  est  ici  recite:  car  comme  il  a  este  monstre  ci-dessus,  les  Corinthiens  se  plaisoyent  en  leur  estat,  et  leur  sembloit  qu'il  n'y  eust  en  eux  qu'une  sainctete  Angelique.  Voyla  quelle  estoit  leur  fole  ambition.  Sainct  Paul  voyant  qu'ils  se  glorifioyent  ainsi  en  eux,  et  sans  propos,  leur  remonstre  que  ce  n'est  point  assez  d'avoir  bien  commence,  mais  qu'il  faut  tousiours  marcher  plus  outre.  Vray  est  que  desia  il  avoit  touche  ceste  doctrine,  mais  maintenant  il  la  conferme  par  l'exemple  du  peuple  d'Israel.  Voici  donc  en  somme  ce  qu'il  dit  :  Je  voy  vostre  folie,  que  vous  cuidez  estre  parvenus  iusques  au  sommet  de  toute  sainctete  :  cependant  il  y  a  en  vous  de  vices  grands  et  enormes,  et  qui  vous  doyvent  faire  honte.  Mais  prenez  le  cas  que  vous  fussiez  en  bon  train,  il  vous  faudroit  encore  neantmoins  songneusement  regarder  a  poursuyvre  vostre  course  iusques  a  la  fin.  Car  tous  ceux  qui  se  mettent  a  courir,  n'obtiennent  pas  le  prix:  et  de  cela  maintenant  ie  vous  en  allegue  un  exemple  digne  de  memoire:  et  non  pas  un  seulement,  mais  plusieurs.  Contemplez  ce  qui  est  advenu  au  peuple  de  Israel:  car  ceste  Eglise-la  est  un  miroir  pour  nous.  Vous  scavez  les  biens  que  Dieu  leur  a  eslargis,  et  cependant  il  n'a  pas  laisse  d'y  faire  des  chastimens  horri-