5:580  incontinent  de  leur  coustume,  veu  qu'il  y  auroit  convenance  en  doctrine.  De  l'usage  entier  du  Sacrement.  Nous  prions  grandement  qu'on  ayt  esgard  aux  consciences,  lesquelles  sont  tenues  fort  perplexes  en  plusieurs  lieux.  Elles  congnoissent  que  ceste  facon  a  este  baillee  de.  [fol.  82]  Christ,  comme  dict  sainct  Paul:  I'ay  receu  du  Seigneur  ce  que  ie  vous  ay  enseigne.  Et  puis  que  le  testament  de  Fhomme  n'est  point  a  violer,  combien  moins  est  il  licite  de  violer  le  Testament  de  Christ?  Or  Christ  nous  ordonne  ce  Sacrement  soubz  le  nom  de  Testament,  disant  :  Voicy  le  calice  du  nouveau  Testament.  Plusieurs  congnoissent  ces  choses,  et  quand  on  ne  donne  point  le  Sacrement  entier,  les  uns  s'en  abstiennent  du  tout,  les  aultres  y  viennent  en  trouble  de  conscience.  Or  il  fault  surtout  mettre  ordre  que  ce  Sacrement  qui  doit  apporter  consolation  et  nous  donner  fiance,  soit  receu  en  conscience  paisible  et  allegre,  et  que  le  coeur  estant  resiouy  par  foy  remercie  Christ,  et  ainsi  que  ce  soit  vrayement  eucharistie,  comme  on  ia  nomme,  c'est  a  dire,  action  de  grace.  Or  si  apres  avoir  accorde  de  la  doctrine,  on  exhortoit  le  peuple  a  en  user  ainsi,  et  l'usage  fust  restitue,  la  concorde  seroit  ia  faicte,  car  la  persecution  seroit  cessee,  et  la  pure  et  saine  doctrine  seroit  proposee.  Et  combien  que  tous  ne  changeassent  pas  subitement  leur  coustume,  toutesfoys  il  n'y  auroit  point  de  discord  publique  en  l'usage:  car  nous  n'accusons  pas  ceux  qui  ne  sont  encores  suffisamment  instruictz,  et  toutesfoys  sont  dociles,  mais  nous  accusons  les  persecuteurs,  et  ceulx  qui  soustiennent  la  doctrine  contraire:  ascavoir  qu'il  est  licite  de  changer  l'institution  de  Christ,  ou  approuver  le  changement.  Et  n'est  pas  pourtant  condamnee  l'Eglise  qui  a  este  par  cy  devant,  car  la  saincte  Eglise  a  aucunesfoys  ses  pailles  (comme  dict  sainct  Paul)  lesquelles  Dieu  pardonne,  comme  les  aultres  ignorances,  moyennant  qu'on  retienne  le  fondement  ou  le  chef,  c'est  a  dire  qu'on  cherche  remission  des  pechez  en  Iesus  Christ  par  foy.  Encores'  y  a  il  eu  plus  d'abuz  aux  messes,  et  en  l'adoration  et  invocation  des  sainctz:  pour  ceste  cause  il  a  este  predict,  que  les  derniers  temps  de  l'Eglise  seroyent  pleins  de  perilz,  comme  la  deffence  de  mariage,  et  les  superstitions  monastiques,  ont  este  en  ruyne  a  plusieurs.  En  ceste  [fol.  83]  sorte  plusieurs  sont  periz  par  l'abuz  des  messes  et  l'adoration  des  sainctz.  Maintenant  puis  que  les  abuz  sont  descouvers,  on  ne  les  doibt  maintenir,  mais  corriger.