35:580  nous  cognoissons  nostre  fragilite,  et  le  prions  qu'il  nous  supporte:  et  puis  qu'il  nous  conferme,  afin  que  nous  soyons  bien  resolus  en  sa  Parole.  Voyla  donc  en  quelle  sorte  il  nous  y  faut  proceder:  et  en  ce  faisant  nous  sentirons  que  ceci  n'a  point  este  seulement  escrit  pour  la  personne  du  Roy  Ezechias,  mais  que  Dieu  a  voulu  donner  une  instruction  commune  a  toute  son  Eglise,  afin  qu'en  nos  troubles,  quand  nous  serons  venus  iusques  a  l'extremite,  voire  iusques  au  profond  d'enfer,  nous  scachions  neantmoins  que  nous  devons  avoir  nostre  refuge  a  celuy  qui  nous  appelle  et  convie  tant  doucement,  esperans  qu'il  fera  valoir  sa  vertu,  combien  que  pour  un  temps  elie  soit  eslongnee  de  nous,  et  que  nous  n'en  voyons  nul  signe:  et  qu'ainsi  il  nous  donnera  de  quoy  le  glorifier.  Et  aussi  nous  sommes  instruits  d'appliquer  toute  nostre  vie  a  benir  le  nom  de  Dieu,  et  a  chanter  ses  louanges,  selon  ce  que  nous  avons  experimente  sa  bonte  envers  nous.  Or  nous-nous  prosternerons  devant  la  Maieste  de  nostre  bon  Dieu  en  cognoissance  de  nos  fautes,  le  prians  que  de  plus  en  plus  il  nous  les  face  sentir,  et  que  ce  soit  pour  estre  du  tout  abbatus  et  humiliez  devant  luy:  et  que  nous  bataillions  contre  les  vices,  lesquels  nous  font  la  guerre,  scachons  que  nostre  Seigneur  nous  a  ordonnez  a  ce  combatci,  iusques  a  ce  que  nous  soyons  plenement  renouvelez  et  revestus  de  sa  Iustice,  et  qu'il  n'y  ait  nulle  contradiction  qui  nous  empesche  d'obeir  a  sa  bonne  volonte.  Que  non  seulement  il  nous  face  ceste  grace,  mais  a  tous  peuples  et  nations,  etc.