32:580  combien  il  nous  est  necessaire  de  tousiours  demander  a  Dieu  qu'il  nous  instruise  plus  amplement,  que  nous  le  recognoissions  mieux  que  nous  n'avons  point  fait:  ouy,  mesmes  quand  il  nous  semblera  que  nous  aurons  tout  cognu,  que  nous  ad  visions  qu'encores  avons-nous  besoin  de  profiter  tousiours  de  plus  en  plus.  Car,  ie  vous  prie,  qui  sera  celuy  de  nous  qui  s'osera  accomparer  a  David?  Voyla  un  Prophete  si  excellent,  qu'il  est  comme  un  Ange  de  Dieu:  aussi  nous  voyons  comme  Dieu  luy  avoit;  revele  ses  secrets,  comme  s'il  eust  este  ravy  au  Royaume  celeste:  et  toutesfois  ayant  de  tels  dons,  comme  nous  les  cognoissons  excellens,  il  demande  encores  d'estre  enseigne  aux  statuts  de  Dieu.  Et  qui  sera  celuy  de  nous  qui  n'en  aura  plus  de  besoin?  Ainsi  donc,  quand  nous  aurons  beaucoup  cognu  en  la  parole  de  Dieu,  non  seulement  pour  nous,  mais  pour  instruire  nos  prochains:  que  nous  ne  laissions  pas  toutesfois  de  nous  rendre  tousiours  dociles  a  luy,  de  demander  qu'il  nous  face  la  grace,  que  nous  profitions  encores  de  plus  en  plus.  Et  d'autant  nous  faut-il  mieux  noter  la  raison  que  met  David  en  avant:  Car  la  terre  est  pleine  de  ta  misericorde.  Comme  s'il  disoit,  Seigneur,  tu  espans  ta  bonte  paternelle  sur  toutes  creatures:  nous  voyons  les  bestes  qui  sont  nourries  de  ta  misericorde,  nous  voyons  les  arbres  qui  fleurissent,  on  voit  la  terre  germer,  on  voit  que  ta  bonte  est  espandue  et  haut  et  bas:  et  comment  seroit-ce  donc  que  tu  ne  ferois  bien  a  tes  enfans?  Ie  suis  du  nombre  de  ceux  qui  t'invoquent,  qui  ont  mis  leur  fiance  en  toy.  Puis  qu'ainsi  est  donc  que  tu  te  monstres  si  benin  envers  toutes  creatures,  tu  ne  me  defaudras  point.  La  raison,  dy-ie,  qui  est  yci  exprimee,  a  servy  a,  David  de  confirmation,  afin  qu'il  ne  doutast  point  qu'il  ne  deust  obtenir  la  requeste  qu'il  fait.  Et  ainsi,  toutes  fois  et  quantes  que  nous  prierons  Dieu  qu'il  nous  enseigne  en  ses  statuts,  que  sa  bonte  de  laquelle  il  use,  et  laquelle  est  espandue  sur  toutes  creatures,  nous  serve  comme  d'un  bon  fondement,  sur  lequel  nous  puissions  bastir  toutes  nos  requestes.  Et  puis  que  Dieu  nous  a  fait  ceste  grace  de  nous  advouer  du  nombre  de  ses  enfans,  et  se  declarer  Pere  envers  nous,  que  nous  soyons  certains  de  n'estre  point  refusez  de  luy  en  toutes  les  choses  qu'il  nous  a  promises,  veu  qu'il  se  monstre  ainsi  benin  et  liberal  envers  toutes  creatures.  Suyvant  ceste  saincte  doctrine,  nousnous  prosternerons  devant  la  face  de  nostre  bon  Dieu,  en  cognoissance  de  nos  fautes.  Le  prians  qu'il  luy  plaise  nous  toucher  tellement  d'une  vraye  crainte  et  droite  de  sa  maieste,  que  luy  rendans  l'honneur  et  la  reverence  que  nous  luy  devons,  nous  soyons  songneux  d'y  profiter  de  plus  en  plus.  Voire:  et  que  nous  y  soyons  tellement  adonnez,