9:58  colao  Papa.  Eorum  tyrannidi  calculum  tuum  non  dubitanter  addis,  ac  si  haeresim  iuste  damnassent.  Qualis  autem  a  misero  illo  confessio  fuit  extorta?  nempe  post  consecrationem  verum  corpus  et  sanguinem  Christi  sensualiter  et  in  veritate  manibus  sacerdotum  tractari,  frangi,  et  fidelium  dentibus  atteri.  Sic  enim  ad  verbum  sonat  quae  illi  a  concilio  dictata  fuit  retractationis  formula.')  Iam  si  non  alia  lege  Westphalum  placare  licet,  quam  si  fateamur  dentibus  sensualiter  Christum  atteri:  nonne  centum  potius  mortes  praeoptandae  sunt,  quam  ut  se  quispiam  tanti  sacrilegii  monstro  implicet?  Cuius  tantopere  puduit  ipsos  etiam  canonistas,  ut  confessi  sint  maiorem  his  verbis  subesse  haeresim,  nisi  referantur  ad  species  panis  et  vini,  quam  si  quis  panem  et  vinum  dicat  nuda  esse  signa.  En  cur  Berengarii  nomen  mutuari  debuerit  Westphalus  noster,  quo  nobis  terrorem  incuteret.  Nec  vero  mirum  est,  novos  papae  satellites  ex  tyrannica  eius  officina  sibi  temere  arma  arripere,  qui  in  nos  mera  anathemata  subinde  crepant.  Haec  est  scilicet  humanitas,  qua  me  quotidie  in  acie  [pag.  26]  stantem,  et  ad  primos  quosque  hostium  iactus  expositum  boni  commilitones  sublevant.  Nec  Ioachimo  satis  est  eorum  in  me  rabiem  virulentis  calumniis  acuere,  nisi  me  pedibus  conculcans,  quod  liberius  eum  coarguere  ausus  sum,  extremae  petulantiae  crimen  mihi  obiectet:  se  vero,  quidquid  probrorum  vomat,  ab  eodem  crimine  absolvat,  quia  in  haereticum  quidvis  licet.  Atqui  quum  haec  una  ei  sit  insaniendi  ratio,  quod  doctrinae  meae  et  fidei  veritas  nullos  eius  morsus  admittit,  cuius  ponderis  fore  speravit  tam  futile  convicium?  Quod  si  hoc  praetextu  quidvis  blaterandi  licentiam  tantopere  appetit,  palam  cum  papistis  syncretismum  ineat:  quibus  nihil  aliud  sonat  haeretici  nomen,  quam  romanae  sedis  adversarium.  Nam  quod  tam  fastuose  nos  ab  ecclesiis  damnatos  pronunciat,  id  propius  expensum,  ut  reliqua  eius  dicta,  in  nihilum  recidet.  Nisi  fortes  Tridentino  concilio  se  tanquam  Aiacis  clypeo  armet,  vel  Christi  ecclesias  ad  paucos  suos  sodales  alliget,  qui  eodem  fervent  impetu.  Semper  enim  graves  et  cordatos  doctores  excipio,  qui  illis  permixti  non  modo  placide  se  continent,  sed  utcunque  paululum  [pag.  27]  a  nobis  dissentiant,  non  tamen  a  fraterna  societate  abhorrent:  et  quia  de  summa  inter  nos  convenit,  pacem  libenter  nobiscum  fovent  ac  colunt:  adeoque  reconciliatam  inter  ecclesias  gratiam  summopere  cupiunt.  Cuius  studii  simulac  oblata  fuerit  occasio,  documentum  non  obscurum  daturos  esse  arbitror.  Nec  vero  tantum  sua  importunitate  proficiet  Westphalus,  ut  illorum  suffragiis  vel  nutu  approbetur  haec  scelerata  divulsio,  quam  molitur:  1)  De  consecr.  Distinct.  2  c.  Ego  Berengarius.