8:58  illud  de  sacra  Domini  coena  certamen  subortum  est,  in  cuius  societatem  plerique  alii  sunt  pertracti.  Ab  isto  summorum  ducum  conflictu  trepidationem  ad  tirones  pervenire  magis  dolendum  est  quam  mirandum.  Monendi  tamen  sunt  ipsi  quoque  tirones,  ne  ultra  modum  turbentur:  hanc  esse  vetustam  Satanae  vafritiem,  cordatos  alioqui  Dei  servos  ad  mutuam  contentionem  rapere,  quo  retardet  sanae  doctrinae  cursum.  Quis  Satanae  insidiis  ultro  cedere  velit?  Sic  Pauli  cum  Barnaba  dissidium  usque  ad  paroxysmum  processit  (Act.  15,  39).  Sic  eiusdem  Pauli  cum  Petro  dissensio  in  manifestum  conflictum  erupit  (Gal.  2,  ll).  In  illis  tribus  agnoscunt  omnes  quod  dixi  Satanae  stratagema:  in  praesenti  negotio,  ubi  salus  sua  vertitur,  cur  caecutiunt?  Excipiet  quispiam,  non  fuisse  illas  de  doctrina  concertationes.  Quid?  An  quum  mosaicae  legis  caeremonias  quidam  urgerent  (Act.  15,  2),  non  veniebat  in  quaestionem  doctrina?  Atqui  eousque  perductum  est  schisma,  ut  ecclesias  fere  omnes  scinderet.  An  eius  perturbationis  causa  evangelium  reiici  aequum  fuisse  dicent?  Lutherum,  et  eos  quibuscum  dissensit,  cordatos  fuisse  homines  et  singularibus  Dei  donis  ornatos  constat.  In  tota  pietatis  summa  mirabilis  fuit  eorum  consensus.  Quis  rectus  esset  ac  sincerus  Dei  cultus,  uno  ore  tradiderunt:  eum  ab  innumeris  superstitionibus  et  idololatriis  repurgare,  a  pravis  hominum  commentis  asserere  conati  sunt.  Eversa  operum  fiducia,  qua  miseri  homines  inebriati  erant,  adeoque  fascinati,  totam  salutem  in  Christi  gratia  repositam  esse  docuerunt.  Christi  virtutem,  quae  vel  iacuerat  prostrata,  vel  [pag.  74]  demersa  latuerat,  magnifice  extulerunt.  Quaenam  vera  sit  invocandi  ratio,  quae  poenitentiae  vis  et  natura,  unde  oriatur  et  quos  fructus  producat  fides,  quae  legitima  sit  ecclesiae  gubernatio,  ab  illis  non  varie  traditur.  Tantum  in  ipsis  symbolis  aliquid  fuit  dissentaneum.  Et  tamen  hoc  asserere  non  temere  audeo:  nisi  partim  nimia  contentionum  vehementia  exacerbati,  partim  sinistris  suspicionibus  occupati  fuissent  animi,  non  tantum  fuisse  dissidium,  quin  facile  conciliari  posset.  Quod  si  illo  disputandi  fervore  non  rite  explicari  controversia  potuit:  quid  nunc  saltem  obstat,  quominus  veluti  sedato  tumultu  simplex  audiatur  veritas?  Quis  verus  sit  sacramentorum  usus,  optime  inter  nos  convenit:  Sacramenta  in  hoc  instituta  esse,  ut  Dei  promissiones  cordibus  nostris  obsignent,  ut  fidei  nostrae  adminicula  et  divinae  gratiae  sint  testimonia,  communiter  omnes  tradimus.  Non  inanes  esse,  aut  nudas  mortuasque  figuras  diserte  ostendimus:  quum  et  efficax  per  spiritus  sancti  virtutem  sit  eorum  usus,  et  arcana  eiusdem  spiritus  sancti  virtute  Deus  vere  praestet  quaecunque  illic  demonstrat.  Itaque  panem  et  vinum  in  sacra  coena  fatemur  non  vacuas  esse  tesseras  eius  communicationis,  quam  ha-