50:58  16.  Quamobrem  non  deficimus.  Nunc  quasi  evicta  causa  in  maiorem  confidentiam  attollitur  quam  prius.  Non  est,  inquit,  causa  cur  despondeas  mus  animum,  aut  fatigemur  sub  crucis  onere,  cuius  tam  felix  nec  mihi  solum,  sed  aliis  quoque  salutaris  est  successus.  Ita  hortatur  Corinthios  suo  exemplo  ad  fortitudinem,  si  quando  contingat  ipsos  similiter  affligi:  deinde  retundit  illam  insolentiam,  in  qua  non  mediocriter  peccabant,  quod  ambitione  occupati,  quo  quisque  remotior  erat  a  cruce  Christi,  eo  maiore  illum  habebant  in  pretio.  Etsi  externus  homo  noster.  Externum  hominem  male  quidam  et  imperite  cum  veteri  homine  confundunt.  Est  enim  longe  aliud  vetus  homo:  de  quo  Rom.  6,  6,  diximus.  Falso  etiam  Chrysostomus  et  alii  tantum  ad  corpus  restringunt:  nam  apostolus  hac  voce  comprehendere  voluit  quidquid  ad  praesentem  vitam  spectat.  Quemadmodum  hic  duos  homines  constituit:  ita  duas  tibi  vitas  propone,  terrenam  et  coelestem.  Exterior  homo  conservatio  est  terrenae  vitae,  quae  non  tantum  aetatis  flore  et  bona  valetudine,  sed  opibus  etiam,  honoribus,  amicitiis  et  aliis  subsidiis  continetur.  Quantum  ergo  nobis  imminuitur  vel  deperit  ex  bonis  illis,  quae  ad  statum  vitae  praesentis  tuendum  requiruntur,  tantundem  corrumpitur  externus  noster  homo.  Quia  enim  nimium  in  praesenti  vita,  quamdiu  ad  votum  fluunt  omnia,  occupamur:  ideo  Dominus  paulatim  nobis  auferendo,  quae  nos  implicitos  tenent,  ad  meditationem  vitae  melioris  revocat.  Sic  ergo  vitae  praesentis  statum  inclinare  necesse  est,  ut  homo  interior  reflorescat:  quia  quod  terrenae  vitae  decedit,  accrescit  coelesti  saltem  in  fidelibus.  Interit  enim  etiam  in  reprobis  externus  homo,  sed  nulla  compensatione  :  in  filiis  Dei  vero  talis  corruptio  initium  est  generationis  et  tanquam  causa.  Id  fieri  quotidie  dicit,  quia  assidue  nos  ad  hanc  meditationem  Deus  exercet.  Utinam  id  animis  nostris  penitus  insideat,  ut  continuo  temporis  successu  proficiamus  in  externi  hominis  interitu.  17.  Levitas  momentanea.  Quia  caro  nostra  semper  interitum  suum  refugit,  qualiscunque  proposita  fuerit  merces:  ac  longe  magis  afficimur  praesenti  sensu  quam  spe  coelestium  bonorum:  ideo  Paulus  afflictiones  et  aerumnas  piorum  nihil  aut  minimum  habere  acerbitatis  admonet,  si  cum  infinito  aeternae  gloriae  bono  conferantur.  Dixerat  non  debere  nobis  molestam  esse  corruptionem  externi  hominis:  quoniam  ex  ea  renovatio  hominis  interni  pullulet.  Terum  quia  visibilis  est  corruptio,  renovatio  autem  invisibilis:  Paulus,  ut  carnalem  praesentis  vitae  affectum  nobis  excutiat,  miserias  praesentes  cum  futura  felicitate  componit.  Haec  autem  sola  comparatio  abunde  sufficit  ad  imbuendos  aequitate  et  moderatione  piorum  animos,  ne  crucis  gravitate  oppressi  concidant.  Unde  enim  fit  ut  tam  difficilis  sit  res