42:58  dront  faire  desdire,  comment  y  procederont  ils  ?  par  flateries:  et  mon  ami  veux  tu  estre  coulpable  de  ta  mort?  ne  vaut  il  pas  mieux  que  tu  ne  sois  point  si  sage,  que  de  mettre  ainsi  en  confusion  tout  le  monde?  n'est  ce  point  une  trop  grande  presumption  a  vous,  qui  n'estes  qu'un  petit  nombre  de  gens,  que  vous  voulies  reformer  tout  le  monde,  voila  tous  les  grands  prelats  de  l'Eglise,  voila  tous  les  princes,  et  ceux  qui  sont  en  credit  et  authorite,  qui  sont  entierement  contre  vous,  et  que  voules  vous  dire?  et  encores  que  les  choses  aient  este  mal  ordonnees,  ne  vaut  il  pas  mieux  dissimuler,  que  de  mettre  tant  de  troubles  par  tout,  s'il  y  ha  quelque  desordre,  est  ce  a  faire  a  une  petite  poignee  de  gents  a  le  corriger?  il  ne  faut  pas  donc  ainsi  troubler  le  monde  sans  propos,  mais  il  faut  vivre  en  paix,  attendant  que  les  choses  soient  mieux  ordonnees.  Voila  donc  comme  auiourd'huy  Sathan  machinera  bien  par  flateries  de  gaigner  les  simples,  et  les  pauvres  gens  qui  ne  seront  asses  munis  ne  resolus  en  la  parole  de  Dieu,  et  c'est  ce  que  l'ange  ha  ici  entendu,  car  le  diable  nous  assaut  tousiours  par  deux  moiens,  il  est  appele  pere  de  mensonge,  est  appele  aussi  meurtrier  au  huictieme  de  S.  Iean.  Or  il  pratique  tous  ces  deux  offices  la,  et  les  ha  pratique  des  le  commencement  du  monde,  car  d'un  coste  il  viendra  par  mensonges  et  tromperies,  a  fin  de  nous  esblouir  les  yeux.  Quand  ie  parle  de  Sathan,  i'entens  aussi  tous  ses  supposts  lesquels  sont  menes  de  son  Esprit.  Les  meschans  donc  useront  de  ces  mensonges  ici,  a  fin  de  faire  que  les  bons  qui  n'ont  point  une  telle  fermete  comme  il  seroit  bien  requis  se  divertissent.  Voila  donc  les  mensonges,  et  puis  il  y  aura  aussi  la  cruaute  comme  Sathan  est  un  meurtrier,  on  ne  orra  sinon  desgorger  les  menaces,  on  orra  des  edits  qui  se  feront  sur  peine  de  la  mort,  et  non  point  d'une  mort  commune,  mais  d'une  cruaute  si  excessive  que  rien  plus,  a  scavoir  d'estre  brusle  tout  vif,  et  encores  ne  se  contentera  on  point  d'estre  brusle  tout  vif,  mais  il  faudra  estre  brusle  a  petit  feu,  et  puis  ce  n'est  pas  encores  tout,  mais  il  faudra  que  la  langue  soit  couppee,  et  puis  il  faudra  qu'on  ait  este  torture  et  gehenne,  a  fin  de  reveler  les  pauvres  fideles  et  trahir  ses  compagnons,  et  que  la  cruaute  s'estende  plus  loing.  Voila  donc  comme  Sathan  besongne  par  cruaute  pour  monstrer  qu'il  est  meurtrier  de  nature.  Or  voiant  cela  il  faut  que  de  nostre  part  nous  soions  confermes,  non  seulement  contre  la  rage  et  la  cruaute  des  meschants,  mais  aussi  contre  toutes  leurs  tromperies  et  leurs  mensonges,  contre  toutes  leurs  flateries,  desquelles  l'ange  parle  ici,  que  nous  aions  les  aureilles  bien  estoupees,  a  fin  de  n'escouter  point  les  allechemens  qui  nous  seront  faits  pour  nous  divertir  de  la  connoissance  de  nostre  Dieu,  et  au  reste  notons  que  ces  flateries  ici  s'estendent  encores  plus  loing,  car  sous  couleur