40:58  pite  usque  ad  pedes,  sed  considero  quales  sint  oculi,  deinde  qualia  sint  latera,  qualis  statura,  sitne  procera  an  brevis.  Quum  ergo  respicimus  in  homines,  in  arbores,  tunc  sufficit  adspectus  noster  ad  singulas  partes  excutiendas.  Sed  si  volumus  oculos  coniicere  in  solem,  statim  hebescent:  tantus  enim  est  fulgor  solis,  ut  nos  perstringat.  Quod  si  oculi  nostri  non  possunt  ferre  solis  splendorem,  quomodo  mentis  nostrae  acies  penetraret  usque  ad  Deum  et  excuteret  totam  eius  gloriam?  Huc  ergo  tendit  consilium  prophetae  quum  dicit  se  vidisse  tanquam  speciem  Hasmal.  Diximus  a  quibusdam  angelum  intelligi:  sed  sententia  illa,  meo  iudicio,  stare  non  potest:  ideo  eam  repudiavi:  nec  dubito,  quin  color  notetur,  qualiscunque  sit.  Quod  Hieronymus  vertit  electrum,  relinquo  in  medio:  quod  dicit  pretiosius  esse  auro  et  argento,  vanum  est,  quia  conficitur  ex  utroque  metallo.  Sed  tamen  fuit  color  eximius,  qui  non  tantum  raperet  oculos  prophetae,  sed  perstringeret  splendore  suo,  ita  ut  agnosceret  esse  aliquid  coeleste  et  divinum.  Ideo  adiungit  fuisse  tanquam  speciem  ignis  intus,  quod  ante  explicuimus,  idque  per  circuitum.  Ignis  autem  ille  etiam  sic  apparuit,  ut  propheta  intelligeret  esse  aliquas  notas  gloriae  Dei:  et  interea,  ut  in  fine  videbimus,  sciret  visionem  illam  non  aliter  fore  utilem,  quam  si  modeste  se  contineret  intra  metas:  quia  maiestas  Dei  ubi  occurrit  in  medium,  potest  obruere  ipsos  angelos.  Quid  ergo  nobis  fiet?  Verum  Deus  se  ita  ad  captum  nostrum  attemperat,  ut  visiones  sint  nobis  utiles,  modo  ne  superbiamus,  vel  ne  efferamur  stulta  et  audaci  curiositate.  Dicit  autem  sursum  et  deorsum  ignem  apparuisse,  hoc  est  supra  lumbos  et  infra,  et  ignem  fuisse  splendidum  in  circuitu.  Postea  adiungit,  28.  Tanquam  similitudinem  arcus  (repetendum  est  verbum,  vidi,  ex  proximo  versu),  tanquam  adspectum  arcus  qui  est  in  nube  in  die  pluviae  (hoc  est  quo  tempore  pluit),  sic  fuit  adspectus  splendoris  in  circuitu.  Haec  visio  similitudinis  gloriae  Iehovae:  et  adspexij  et  cecidi  super  faciem  meam,  et  audivi  vocem  loquentis  (alii  vertunt  loquentem).  Addit  nunc  propheta  oblatam  sibi  fuisse  similitudinem  arcus  coelestis,  quem  profani  homines  vocant  Irim:  et  fingunt  perferre  deorum  mandata,  maxime  vero  Iunonis.  Sed  scriptura  vocat  arcum  Dei,  non  quod  creatus  fuerit  post  diluvium,  quemadmodum  multi  falso  existimant:  sed  quia  Deus  voluit  symbolo  illo  erigere  spem  nostram,  quoties  coelum  obnubilant  crassi  vapores.  Videmur  enim  quasi  demersi  sub  illis  aquis  coelestibus.  Deus  ergo  voluit  occurrere  nostrae  diffidentiae,  quum  arcum  coelestem  testimonium  et  pignus  gratiae  suae  esse  voluit:  quia  dicitur  apud  Mosen  (Gen.  9,  13),  Ponam  arcum