35:58  phantasies:  et  puis  si  nous  parlons,  il  y  aura  tousiours  ie  ne  sai  quoi,  et  nous  n'aurons  iamais  nos  propos  tellement  bridez  court,  qu'il  n'y  ait  tousiours  des  choses  de  nostre  chair,  et  de  nostre  sens  naturel  entortillees  parmi.  Apprenons  donc  de  nous  condamner  encores  que  nous  ayons  este  patiens,  et  puis  que  Iob  en  ce  passage  est  si  grievement  redargue  par  Eliu,  cognoissons  que  nous  serons  trouvez  beaucoup  plus  coulpables,  voire  quand  nous  n'aurons  tasche  d'obeir  a  nostre  Dieu,  et  que  nous  ne  lui  aurons  point  rendu  l'honneur  qui  lui  appartient.  Voila  ce  que  nous  avons  a  noter  sur  ce  passage.  Or  cependant  si  Iob  est  ici  condamne  d'avoir  blaspheme  contre  Dieu,  et  que  sera-ce  quand  nous  serons  tellement  transportez,  qu'il  n'y  aura  plus  de  patience  en  nous,  comme  on  le  voit  le  plus  souvent?  Alors  comment  pourrons-nous  porter  ceste  condamnation,  comme  si  nous  avions  conteste  contre  Dieu,  comme  s'il  cerchoit  des  couvertures  vaines  et  frivoles  pour  exercer  sa  rigueur  contre  nous?  Or  il  est  certain  que  tous  ceux  qui  ne  confessent  point  librement  et  d'un  franc  vouloir  que  Dieu  est  iuste  en  ses  afflictions  et  qui  n'ont  point  cela  tout  conclud  et  arreste,  que  c'est  autant  comme  s'ils  disoyent,  Et  voire,  voici  Dieu  qui  est  un  tyran,  ils  ne  prononceront  point  ce  mot,  mesmes  il  leur  seroit  execrable,  mais  tant  y  a  qu'ils  y  tendent:  car  il  n'y  a  point  ici  de  moyen  quand  nous  ne  glorifierons  point  Dieu  en  sa  iustice,  fecognoissans  que  tout  ce  qu'il  fait  est  fonde  en  raison,  equite  et  droiture,  c'est  autant  comme  si  nous  lui  reprochions  qu'il  exerce  tyrannie  contre  nous.  Il  est  vrai  que  les  blasphemes  ne  seront  point  tousiours  esgaux,  et  aussi  il  n'y  aura  point  un  consentement  tousiours.  Iob  n'estoit  point  venu  iusques  la  de  dire,  II  n'y  a  point  de  raison  pourquoi  Dieu  m'afflige,  mais  d'autant  qu'il  a  eu  ses  bouillons  qui  l'ont  transporte  (comme  nous  avons  veu  par  ci  devant)  voila  comme  il  faut  que  l'Esprit  de  Dieu  le  condamne  en  ce  passage.  Advisons  donc  que  nostre  condamnation  sera  beaucoup  plus  grande  quand  nous  ne  serons  point  du  tout  paisibles  en  nos  afflictions,  mais  qu'il  nous  adviendra  de  murmurer,  encores  que  la  bouche  ne  sonne  mot,  quand  nous  aurons  la  dedans  des  angoisses,  que  nous  serons  comme  si  une  mule  rongeoit  son  frain.  Quand  donc  nous  aurons  ainsi  ces  amertumes  a  l'encontre  de  Dieu,  c'est  autant  comme  si  nous  l'accusions  d'avoir  cerche  des  couvertures  frivoles  sans  qu'il  nous  affligeast  iustement.  Touchant  ce  qui  est  ici  dit,  Dieu  a  mis  mes  pieds  aux  ceps.  Eliu  recite  les  propos  de  Iob  comme  il  avoit  entendu.  Car  Dieu  ne  lui  donnoit  plus  nulle  liberte:  comme  quand  on  tiendra  un  criminel  aux  ceps,  voila  une  espece  de  torture  pour  lui  faire