32:58  passurum,  mox  ad  confirmationem  addat,  se  inimicum  fore  omnibus  maleficiis.  In  postremo  membro  mutatio  numeri  est,  si  ad  personas  declinantium  referas.  Potest  tamen  de  opere  ipso  commode  exponi:  ac  si  dixisset,  nullis  impiis  defectionibus  se  fore  affinem.  4.  (Cor  pravum.)  Quod  pravum  cor  nonnulli  de  perfidis  hominibus  accipiunt,  tanquam  coactum  repudio.  Deinde  contextus  reclamat,  nam  quum  expositive  mox  addiderit,  malum  non  cognoscam,  priore  membro  haud  dubie  se  immunem  fore  a  perfidia  et  pravitate  affirmat.  Ac  summa  est,  Davidem  operam  daturum  ut  sibi  caveat  ab  omni  maleficio:  et  quid  sit  proximis  iniuriam  facere,  nesciat.  5.  (Detrahentem.)  Hoc  versu  clarius  disserit  de  regis  officio,  qui  gladio  armatus  est  ad  coercendos  improbos.  Nam  etsi  merito  bonis  omnibus  displicent  obtrectatio,  superbia,  et  alia  vitia,  non  est  tamen  eorum  cuiusque  e  medio  tollere  superbos  vel  obtrectatores:  quia  non  sunt  instructi  publica  potestate,  sed  manus  habent  ligatas.  Atque  haec  distinctio  tenenda  est,  ut  in  modestia  se  contineant  filii  Dei,  nec  quisquam  vocationis  suae  fines  transsiliat.  Nam  certe  quamdiu  privatus  vixit  David,  nunquam  ausus  fuisset  hoc  tentare:  sed  solio  impositus  gladium  sumpsit  e  manu  Dei  quem  ad  ulciscenda  maleficia  exsereret.  Species  autem  quasdam  designat,  ut  per  synecdochen  significet  se  omnium  scelerum  fore  vindicem.  Pestis  apprime  noxia  est,  clancularia  et  furtiva  detractio,  perinde  enim  est  ac  si  quis  hominem  per  insidias  occidat:  imo  calumniator,  non  secus  ac  veneficus  incautos  opprimit.  Atque  hoc  signum  est  perversae  et  proditoriae  naturae,  ita  laedere  alterius  famam  ut  non  sit  defensioni  locus.  Malum  ergo  hoc  quia  nimis  passim  grassatur,  et  tamen  minime  est  tolerabile  in  hominum  vita,  David  ulciscendum  suscipit.  Superbos  deinde  duabus  loquendi  formis  notat.  Altos  oculis  vocat,  non  quod  supercilia  attollat  quisquis  superbus  est:  sed  quia  ut  plurimum  elato  vultu  produnt  superbi  animi  sui  altitudinem.  Vocat  latos  corde,  quia  inflatos  esse  et  turgidos  necesse  est  qui  ad  res  magnas  adspirant.  Nihil  enim  illis  satis  est  nisi  deglutiant  totum  mundum.  Atque  hinc  colligimus,  non  vigere  rectum  ordinem,  nisi  principes  reprimendae  superbiae  sedulo  invigilent,  quae  secum  necessario  et  ferociam  et  crudelitatem  trahit,  parit  contumelias,  rapinas,  et  quodvis  iniuriae  genus.  Ita  fiet  ut  simplices  et  quieti  homines  potentiorum  libidini  expositi  sint,  nisi  opposita  principum  autoritas  eorum  audaciam  arceat.  Iam  quum  velit  Deus  piis  regibus  detestabilem  esse  superbiam,  certum  est  ei  perinde  exosam  esse:  ideoque  a  filiis  suis  placidam  mansuetudinem  requirit,  quia  professus  est  eorum  omnium  hostis  qui  emergere  altius  conantur  quam  ferat  ipsorum  conditio.