28:58  un  tel  regard  aux  hommes,  que  quand  nos  fautes  ne  nous  seront  point  reprochees  devant  eux,  que  nous  n'en  serons  point  accusez,  qu'on  ne  nous  en  fera  point  de  procez,  que  pour  cela  nous  n'en  serons  point  absouts  :  mesmes  que  quelque  fois  il  nous  sera  bon  d'estre  resveillez  par  les  hommes.  Car  quand  nous  sommes  chastiez,  alors  Dieu  fait  ce  que  dit  sainct  Paul  en  l'autre  passage:  c'est  qu'il  nous  punit  selon  la  chair,  afin  que  nous  ne  perissions  point  a  iamais.  Au  reste,  que  nous  ayons  tousiours  nos  yeux  eslevez  a  ce  siege  iudicial,  devant  lequel  il  nous  faut  venir  et  comparoistre.  Combien  que  nous  ayons  este  supportez  en  ce  monde,  et  qu'il  nous  semblera  que  nos  pechez  demeureront  impunis  :  qu'il  nous  en  faudra  porter  double  punition  devant  Dieu,  pource  que  nous  y  aurons  este  obstinez  et  endurcis  iusques  au  bout,  et  que  nous  aurons  abuse  de  sa  patience.  Quand  il  nous  aura  ainsi  longuement  attendu,  et  que  par  douceur  il  aura  tasche  de  nous  gagner  a  soy,  si  nous  luy  avons  este  rebelles,  et  que  nous  ayons  eu  comme  en  risee  la  bonte  de  laquelle  il  usoit  envers  nous,  il  faudra  bien  que  tout  cela  nous  soit  ramentu,  et  a  nos  despens.  Et  au  reste  notons  bien  que  ceste  excuse  est  par  trop  frivolle,  quand  plusieurs  disent:  Et  a  qui  est-ce  que  i'ay  fait  tort?  Auiourd'huy  quand  on  appellera  les  blasphemateurs,  ils  torcheront  leur  bouche,  et  viendront  avec  une  impudence  ie  ne  say  quelle:  Et  qui  est-ce  qui  se  plaint  de  moy?  A  qui  est-ce  que  i'ay  fait  tort?  Si  nous  estions  tous  tels  que  nous  devrions  estre,  il  est  certain  qu'on  crieroit  alarme,  quand  le  nom  de  Dieu  est  blaspheme:  et  nous  devrions  estre  tous  procureurs  en  ceste  cause-la,  quand  Dieu  nous  fait  cest  honneur,  qu'il  veut  que  nous  maintenions  sa  maieste  et  sa  propre  cause.  Or  tant  y  a  qu'on  n'en  tient  gueres  de  conte.  Si  nous  avons  este  iniuriez,  nous  crions  alarme.  Si  Dieu  est  diffame,  que  son  Nom  soit  mis  opprobre,  ce  nous  est  tout  un,  on  coule  cela.  Et  ainsi,  ceux  qui  ont  peche  vilainement  peuvent  dire:  Qui  est-ce  qui  nous  accuse?  Mais  cependant  c'est  un  subterfuge  qui  ne  nous  profitera  gueres  (comme  nous  avons  dit).  Car  Dieu  s'oubliera-il?  souffrira-il  d'estre  ainsi  mesprise,  et  n'en  tiendra  conte?  N'a-il  point  iure  par  son  Nom  qu'il  maintiendra  sa  gloire  iusques  au  bout?  Or  puis  qu'ainsi  est,  qu'est-ce  quand  nous  repliquerons  :  Que  nul  ne  se  peut  plaindre  que  nous  luy  ayons  fait  tort,  quand  nous  aurons  ainsi  offense  la  maieste  de  Dieu?  helas,  n'est-ce  point  plus  que  si  nous  avions  fait  le  guerre  a  toutes  creatures?  Autant  en  est-il  de  la  paillardise.  Il  est  vray  qu'un  homme  qui  a  paillarde  pourra  dire:  Nul  ne  se  plaint  de  moy:  car  les  deux  parties  se  sont  accordees  ensemble.  Mais  quoy?  Voila  le  temple  de  Dieu  (comme  nous  avons  dit)