22:58  Ie  croy  la  remission  des  pechez.  Sur  lequel  fondement  consiste  et  est  appuye  nostre  salut,  veu  que  la  remission  des  pechez  est  la  voie  pour  approcher  de  Dieu  et  le  moyen  qui  nous  retient  et  conserve  en  son  royaulme.  Car  en  la  remission  des  pechez  toute  la  iustice  des  fideles  est  contenue,  laquelle  ilz  obtienent  non  point  par  aucun  leur  merite  mais  par  la  seule  misericorde  du  Seigneur,  quand  estans  oppressez,  affligez  et  confuz  de  la  conscience  de  leurs  pechez  ilz  sont  abbatuz  par  sentiment  du  iugement  de  Dieu,  se  desplaisent  en  eulx  mesmes  et  comme  soubz  un  pesant  faiz  gemissent  et  travaillent,  et  par  ceste  haine  et  confusion  de  peche  ilz  mortifient  leur  chair  et  tout  ce  qui  est  de  eulx  mesmes.  Mais  affin  que  Christ  nous  acquist  remission  des  pechez  gratuite  il  la  luy  mesmes  rachaptee  et  poyee  du  pris  de  son  propre  sang,  auquel  nous  devons  chercher  toute  la  purgation  et  satisfaction  diceulx.  Nous  sommes  doncques  enseignez  de  croire  que  par  la  divine  liberalite,  le  merite  de  Christ  intercedant,  remission  des  pechez  et  grace  nous  est  faicte  a  nous  qui  sommes  appellez  et  inserez  au  corps  de  lEglise,  et  que  nulle  remission  des  pechez  nest  donnee  dailleurs  ne  par  autre  moyen,  ne  a  autres:  attendu  que  hors  ceste  Eglise  et  communion  des  sainctz  il  n'y  a  point  de  salut.  Ie  croy  la  resurrection  de  la  chair,  la  vie  eternelle.  Amen.  Icy  premierement  nous  sommes  enseignez  de  lattente  de  la  resurrection  advenir,  cest  a  scavoir  quil  adviendra  que  le  Seigneur  revoquera  de  pouldre  et  corruption  a  nouvelle  vie  la  chair  de  ceulx  lesquelz  auront  este  consumez  par  mort  devant  le  iour  du  grand  iugement,  par  une  mesme  puissance  quil  a  resuscite  son  Filz  des  mors.  Car  ceulx  qui  lors  seront  trouvez  vivans  passeront  a  nouvelle  vie  plustost  par  soubdaine  immutation  que  par  forme  naturelle  de  mort.  Or  parce  que  la  resurrection  est  commune  aux  bons  pareillement  et  aux  mauvais,  mais  en  condition  diverse,  la  derniere  particule  est  adioustee  laquelle  discerne  entre  nostre  estat  et  le  leur  :  cest  a  scavoir  que  telle  sera  nostre  resurrection,  que  lors  estans  resuscitez  de  corruption  en  incorruption,  de  mortalite  en  immortalite,  et  estans  glorifiez  en  corps  et  en  ame,  le  Seigneur  nous  recevra  en  beatitude  qui  sans  fin  durera,  hors  de  toute  qualite  de  mutation  et  de  corruption.  Ce  qui  sera  la  vraye  et  entiere  perfection  en  vie,  lumiere  et  iustice,  quand  nous  serons  inseparablement  adherans  au  Seigneur,  qui  comme  une  fonteine  qui  ne  peult  tarir  en  contient  en  soy  toute  plenitude.  Et  celle