2:58  [CO  2.58]  potuisse  adduci  ut  evangelium  amplecteretur  pro  certa  Dei  veritate,  quam  ecclesiae  autoritate  victum.  Et  quid  mirum,  si  quis,  nondum  Christo  cognito,  hominum  respectum  habeat?  Non  ergo  illic  docet  Augustinus  fundatam  esse  piorum  fidem  in  ecclesiae  autoritate,  nec  evangelii  certitudinem  inde  pendere  intelligit;  verum  simpliciter  nullam  fore  evangelii  certitudinem  infidelibus,  ut  inde  Christo  lucrifiant,  nisi  ecclesiae  consensus  eos  impellat.  Atque  id  paulo  ante  1)  non  obscure  confirmat,  ita  loquendo:  quum  ego  laudavero  quod  credo,  et  quod  credis  irrisero,  quid  putas  nobis  esse  iudicandum,  quidve  faciendum,  nisi  ut  eos  relinquamus  qui  nos  invitant  certa  cognoscere,  et  postea  imperant  ut  incerta  credamus;  et  eos  sequamur  qui  nos  invitant  prius  credere  quod  nondum  valemus  intueri,  ut  ipsa  fide  valentiores  facti,  quod  credimus  intelligere  mereamur,  non  iam  hominibus,  sed  ipso  Deo  intrinsecus  mentem  nostram  firmante  atque  illuminante?  Haec  certe  sunt  Augustini  verba;  ex  quibus  cuivis  colligere  promptum  est,  non  hanc  sancto  viro  fuisse  mentem,  ut  fidem,  quam  scripturis  habemus,  a  nutu  arbitriove  ecclesiae  suspenderet;  sed  tantum  ut  indicaret  quod  nos  quoque  verum  fatemur,  eos  qui  nondum  spiritu  Dei  sunt  illuminati,  ecclesiae  reverentia  ad  docilitatem  induci,  ut  Christi  fidem  ex  evangelios  discere  sustineant;  atque  ita  hoc  modo  ecclesiae  autoritatem  isagogen  esse  qua  ad  fidem  evangelii  praeparamur.  Nam,  ut  videmus,  piorum  certitudinem  longe  alio  fundamento  vult  esse  suffultam.  Alioqui  non  nego  quin  saepe  Manichaeos  ecclesiae  universae  consensu  urgeat,  dum  scripturam,  quam  illi  repudiabant,  vult  approbare.  Unde  illa  adversus  Faustum  exprobratio  :  2)  quod  se  evangelicae  veritati  non  subdat,  tam  fundatae,  tam  stabilitae,  tanta  gloria  diffamatae,  et  a  tempore  apostolorum  per  certas  successiones  commendatae.  Sed  nusquam  eo  spectat,  ut  pendere  doceat,  quam  scripturis  autoritatem  deferimus,  ab  hominum  definitione  aut  decreto:  tantum,  quod  in  causa  plurimum  valebat,  universale  ecclesiae  iudicium  profert,  in  quo  adversariis  erat  superior.  Si  quis  pleniorem  huius  approbationem  desiderat,  libellum  eius  legat  de  utilitate  credendi;  ubi  reperiet,  non  aliam  credendi  facilitatem  ab  ipso  commendari  nisi  quae  nobis  aditum  modo  praebeat,  sitque  opportunum  inquirendi  exordium,  ut  ipse  loquitur;  non  tamen  in  opinione  acquiescendum  esse,  sed  certa  et  solida  veritate  nitendum.  [Inst  1.7.4.]  Tenendum  quod  nuper  dixi,  non  ante  stabiliri  doctrinae  fidem,  quam  nobis  indubie  persuasum  sit,  autorem  eius  esse  Deum.  Itaque  summa  scripturae  probatio  passim  a  Dei  loquentis  persona  sumitur.