15:58  trum  consensu  communiter  catholiceque  receptas,  praesertim  (ut  interim  alias  prope  infinitas  omittam)  de  transmutatione  et  adoratione  panis  symbolici,  de  purgatorio,  invocatione  divorum,  caelibatu,  libero  arbitrio  et  primatu  romanae  sedis,  in  dubium  non  modo  revocaret,  sed  etiam  editis  voluminibus  in  totum  convelleret  atque  rescinderet,  et  falsas  esse  multis  populis  persuaderet,  nec  tamen  quispiam  nunc  invenitur  ex  iis  qui  evangelium  profitentur,  qui  illum  vel  male  egisse  dicat,  vel  flammeis  suppliciis  dignum  fuisse  sentiat,  qui  ausus  fuerit  tot  catholicas  opiniones  tot  saeculis  confirmatas  suo  spiritu  rescindere,  et  universam  ecclesiam  novis  dogmatibus  conturbare  et  scismate  manifesto  antiquam  aut  saltem  diutinam  religionem  proscindere:  si  uni,  inquam,  monacho  Germano  pacatis  temporibus  et  florente  Romana  sede  tantum  licuit,  cur  Serveto  Hispano,  viro  bene  docto  et  in  sacris  literis  diligenter  versato  atque  exercitato,  non  licuit  iam  commotis  temporibus  et  scismatibus  superinductis,  et  novis  quotidie  hominum  opinionibus,  interpretationibus  et  decretis  gliscentibus,  unicam  opinionem  de  hoc  imaginario  nomine  trinitatis,  de  quo  ne  syllaba  quidem  in  scripturis  invenitur,  ab  ethnicis  philosophis  primum  introductam,  quam  nec  apostoli  nec  eorum  discipuli  unquam  cogitarunt,  in  dubium  revocare  et  scripturae  autoritate  manifestisque  rationibus  erroneam  impiam  et  absurdam  ostendere?  Nullus  spiritus  contemnendus  est  sed  omnia  probanda,  ut  inquit  Paulus,  et  quod  bonum  fuerit  amplectendum.  Quotidie  Deus  novos  spiritus  excitat  ad  revelationem  veritatis  et  iudiciorum  suorum,  et  usque  ad  finem  saeculi  iugiter  excitabit,  ne  quisquam  hominum  sibi  blandiri  queat  se  anum  super  omnes  illustratum,  sibi  uni  omnem  veritatem  patefactam:  quin  imo  omnis  homo  mendax,  et  conclusit  Deus  omnes  sub  peccato  et  mendacio  ut  omnium  misereatur,  et  solus  ipse  verus  et  verax  in  sermonibus  suis  iustificetur.  Sed  ut  ad  exempla  redeam,  annon  Ulricus  Zwinglius,  vir  pius  et  doctus,  fervente  et  novo  spiritu  Martini  opinionem  de  eucharistiae  sacramento  iam  passim  ab  universa  fere  Germania  receptam,  approbatam  et  doctissimorum  hominum  suffragiis  confirmatam  nova  scripturarum  interpretatione  dissolvit,  probabilioremque  demonstrare  conatus  est,  licet  Martinus  verborum  proprietati  magis  haereret,  Ulricus  autem  scripturae  tropum  et  figuram  agnosceret.  Quae  controversia  tanto  hinc  inde  studio,  tot  aculeis  inter  ipsas  evangelicae  professionis  ecclesias  agitata  est,  et  usque  in  hodiernum  diem  tot  contentiosis  et  famosis  libellis  agitatur,  ut  nisi  Deus  optimus  manum  admoveat  non  sit  spes  tantam  contentionem  usque  in  diem  iudicii  consopitam*  iri:  adeo  pertinax  est  quisque  sui  nominis  et  studii  defensor.  Verum  Lutherus  et  Zivinglius  summos