5:579  ACTES  DE  RATISBONNE.  ont  este  multipliees  pource  qu'on  avoit  ceste  imagination  que  c'estoit  chose  meilleure,  que  chascun  eust  sa  Messe  celebree  a  son  intention  particuliere,  que  d'en  avoir  une  generale  pour  tous.  Aultres  opinions  sont  encores  survenues,  que  les  Messes  par  la  dignite  de  l'oeuvre  procedant  de  l'homme,  sont  profitables  pour  les  vivans  et  pour  les  mors.  Ces  horribles  abu  z  sont  sortis  du  changement  de  la  coustume  Apostolique  et  catholique:  laquelle  a  dure  en  l'Eglise  ancienne  long  temps  apres  les  Apostres.  C'est  que  la  Messe  estoit  une  communion  de  plusieurs.  Il  n'y  a  doubte,  qu'il  ne  faille  reprendre  l'applicquation,  qui  se  faict  en  l'oblation:  reprendre  aussi  ceste  opinion,  que  ce  soit  oeuvre  meritoire  pour  les  aultres,  tant  vifz  que  mortz:  veu,  que  cela  est  departir  le  merite  entre  la  passion  de  Christ  et  l'oeuvre  du  Prestre,  contre  ce  qui  est  escript:  Par  une  oblation,  il  a  parfaict  les  Sainctz.  C'est  donc  le  Filz  de  Dieu  mesme,  qui  s'est  offert  au  Pere,  en  mourant  pour  nous:  comme  il  est  escript,  qu'il  s'est  soymesme  offert.  Et  n'y  a  point  d'aultre  sacrificateur  [fol.  81]  qui  entre  au  sanctuaire:  comme  il  est  escript  de  Christ,  que  par  son  propre  sang,  il  y  est  une  foys  entre,  pour  obtenir  redemption  perpetuelle.  Et  n'a  pas  commande  qu'en  la  Cene  il  fust  offert  par  les  aultres  :  mais  a  distribue  aux  aultres  son  corps  comme  un  gage.  Un  chascun  se  doit  applicquer  par  sa  propre  foy  les  benefices  de  Christ.  Il  s'ensuit  donc  que  l'oblation  ne  merite  rien  a  un  aultre.  Item,  Christ  nostre  sacrificateur  a  distribue  seulement  son  corps  en  la  Cene  a  ses  disciples:  et  ne  l'a  pas  offert,  et  n'a  pas  commande  d'offrir  un  sacrifice  pour  les  aultres:  mais  a  dict:  Prenez  mangez.  Or  il  ne  nous  est  licite  de  faire,  sinon  ce  que  a  faict  Christ  nostre  sacrificateur,  pour  nous  donner  exemple,  et  nous  a  ordonne  de  faire  par  sa  parolle.  Au  contraire,  que  l'oblation  ou  application  pour  les  aultres  demeure,  si  on  retient  les  Messes  privees,  il  appert.  Car  ceux  qui  les  retiennent,  disent  en  leur  canon,  que  cela  se  faict  pour  la  redemption  des  ames,  pour  les  vifz  et  pour  les  mors.  Et  ceste  persuasion  demeure  au  peuple,  qu'il  pense  une  telle  oblation  estre  le  principal  service  qu'on  scauroit  faire  a  Dieu,  estant  profitable  pour  les  aultres.  Et  pour  ceste  cause  chascun  faict  chanter  des  Messes  pour  son  salut,  et  par  une  mesme  fantasie  on  en  faict  chanter  pour  les  mortz.  Ces  opinions  et  ces  abuz  seront  a  reprendre.  Toutesfoys  si  ayant  estably  accord  en  doctrine,  on  enseignoit  par  tout  le  peuple,  de  l'usage  du  Sacrement,  de  la  foy,  de  la  vraye  invocation,  et  que  ceste  application  pour  les  vifz  et  pour  les  mortz  fust  appertement  taxee  en  sermons,  pareillement  qu'il  fust  licite  a  quiconque  vouldroit  d'abandonner  les  messes  privees,  il  n'y  auroit  point  de  debat,  encores  que  tous  ne  changeassent  point