40:579  579  PRAELECTIONES  580  22.  Ipse  patefecit  profunda  et  abscondita  :  cognoscit  quod  in  tenebris  (latet):  et  lux  cum  eo  habitat  (vel,  penes  ipsum).  Prosequitur  eandem  sententiam,  et  confirmat,  quod  scilicet  ex  spiritu  Dei  cuncti  mortales  hauriant  quidquid  habent  intelligentiae  et  lucis.  Quanquam  longius  progreditur  hoc  versu  quam  superiore.  Dixerat  enim  in  genere,  sapere  nomines,  et  intelligere  Dei  beneficio:  hic  autem  speciem  unam  sumit,  nempe  ubi  est  rara  et  insolita  intelligentia  illic  clarius  fulgere  donum  Dei:  quasi  diceret,  non  modo  Deum  singulis  mortalibus  distribuere  pro  mensura  suae  liberalitatis  quidquid  habent  acuminis  et  ingenii,  sed  quosdam  ornare  tanta  intelligentia,  ut  appareant  esse  ipsius  interpretes.  Loquitur  ergo  hic  proprie  de  dono  prophetico:  quasi  diceret,  non  tantum  conspici  Dei  bonitatem  in  communi  hominum  prudentia  (quod  scilicet  nemo  est  tam  rudis,  qui  non  discernat  inter  iustum  et  iniustum,  qui  non  teneat  aliquam  rationem  regendae  vitae)  sed  in  prophetis  aliquid  esse  extraordinarium,  quod  nobis  reddit  Dei  sapientiam  magis  admirabilem.  Unde  enim  prophetae  hoc  habent,  ut  vaticinentur  de  rebus  occultis,  ut  penetrent  supra  coelos,  ut  transcendant  totum  mundum?  An  hoc  est  commune  in  hominibus?  Quum  ergo  hoc  communem  hominum  captum  longe  superet,  propheta  docet  illic  plus  laudis  mereri  Dei  beneficentiam  et  virtutem  simul,  quod  revelet  abscondita  et  arcana.  Et  in  hunc  sensum  adiicit,  lucem  apud  Deum  habitare:  quasi  diceret,  longe  differre  a  nobis  Deum  ipsum,  quia  obvolvimur  multis  vel  tenebris  vel  nebulis,  sed  Deo  omnia  esse  liquida,  sic  ut  nusquam  haesitet,  non  inquirat,  non  impediatur  ulla  ignorantia.  Nunc  ergo  tenemus  prophetae  consilium.  Sed  discamus  ex  hoc  loco  tribuere  Deo  laudem,  quam  maior  pars  mundi  sacrilega  audacia  sibi  arrogat:  Deus  autem  ostendit  sibi  esse  propriam.  Quidquid  ergo  intelligentiae  et  iudicii  in  nobis  est,  hoc  meminerimus  Deo  acceptum  referre.  Proinde  etiam  si  qua  tantum  viget  in  nobis  gutta  communis  sensus,  eatenus  iam  obstricti  sumus  Deo,  quia  essemus  similes  truncis,  vel  lapidibus,  nisi  ipse  arcano  suo  instinctu  nos  donaret  intelligentia.  Sed  etiam  si  quis  excellat,  et  sit  in  admiratione  fere  totius  mundi,  ipse  quoque  modeste  se  Deo  subiiciat,  et  agnoscat  eo  magis  se  esse  obstrictum,  quia  pius  aliis  accepit.  Quis  enim  ipsum  discernit,  nisi  Deus?  Quo  ergo  quisque  maiore  praestat  intelligentia:  eo  magis  extollat  Dei  beneficentiam,  sibi  omnia  derogans.  Tertio  discamus  intelligentiam  rerum  spiritualium  esse  rarum  et  singulare  donum  spiritus  sancti,  et  illic  praecipue  fulgere  Dei  virtutem.  Caveamus  ergo  a  diabolica  superbia,  qua  videmus  fere  totum  mundum  esse  ebrium,  et  falso  turgere.  Atque  in  hac  parte  glorifice-