7:578  memoriam  subinde  in  animis  nostris  renovaremus,  et  fructum  istius  oblationis  cruentae,  qua  in  aeternum  consummavit  sanctificatos  (Hebr.  10,  14),  in  nos  transferremus.  Hoc  est  enim  facere  in  memoriam  eius,  id  est,  gratis  animis  commemorare  mortem  Domini,  et  per  memoriam  et  meritum  passionis  eius  deprecari  patrem,  ut  nobis  reconcilietur.  Haec  est  munda  et  salutaris  oblatio,  illius  unici  sacrificii,  quo  omnium  salus  comparata  est,  rememorativa,  non  solum  significans,  sed  re  ipsa  in  se  comprehendens  veritatem  illarum  rerum,  quas  diversorum  sacrificiorum  oblationes  olim  praesignabant:  eadem  nimirum  corporis  et  sanguinis  Christi  hostia,  quae  in  cruce  est  oblata,  non  alia:  idem  agnus,  non  alius,  et  unus  utrobique  Christus,  sed  tunc  cruento  et  passibili  modo  oblatus  est,  qua  oblatione  omnibus  credentibus  remissionem  peccatorum  et  redemptionem  sufficienter  impetravit  [pag.  53]  Nunc  vero  eundem  sub  mysterio  et  modo  incruento  et  impassibili  offerimus,  non  ut  peccatorum  remissionem  et  animarum  nostrarum  salutem  iam  primum  promereamur,  sed  ut  passionis  dominicae  memoriam  recolentes  Deo  gratias  agamus  pro  salute  nobis  in  cruce  impetrata:  et  ibi  promeritam  peccatorum  remissionem  et  redemptionem  fide  et  devotione  nobis  applicemus  et  appropriemus.  Hanc  tam  salutarem  victimam  in  spiritu  praevidit  Malachias,  quum  ait:  Non  est  mihi  voluntas  in  vobis,  dicit  Dominus  exercituum,  et  munus  non  suscipiam  de  manu  vestra:  ab  ortu  enim  solis  usque  ad  occasum  magnum  est  nomen  meum  in  gentibus,  et  in  omni  loco  sacrificatur  et  offertur  nomini  meo  oblatio  munda  (Mal.  1,  10).  Quod  vaticinium  de  solis  spiritualibus  sacrificiis  accipi  non  potest,  quae  nullius  legis  propria,  sed  omnibus  temporibus  et  hominibus  communia  exsistunt,  et  cum  sacrificiis  veterum  semper  commixta  duraverunt.  At  ipsa  verborum  serie  satis  convincitur,  prophetam  loqui  de  sacrificio  quod  sublatis  veteribus  sacrificiis  in  locum  eorum  erat  successurum.  Unde  recte  haec  verba  de  sacratissimo  Christi  sacrificio  accipiuntur,  non  illo  quidem,  quo  se  in  cruce  pro  peccatis  generis  humani  obtulit  (illud  enim  nec  inter  gentes,  nec  in  omni  loco,  sed  in  Iudaea  consummatum  est)  sed  quod  ex  gentibus  [pag.  54]  congregata  ecclesia  per  totum  terrarum  orbem  offert  ad  recordationem  mortis  Domini,  et  ad  virtutem  eius  in  credentes  transfundendam:  atque  hic  loci  illius  intellectus  luculentis  patrum  testimoniis  roboratur.  Irenaeus  lib.  a.  contra  haereses  cap.  32:  Eum  qui  ex  creatura  panis  est  accepit,  et  gratias  egit,  dicens:  Hoc  est  corpus  meum.  Et  calicem  similiter,  qui  est  ex  ea  creatura,  quae  est  secundum  nos,  suum  sanguinem  confessus  est,  et  novi  testamenti  novam  docuit  oblationem,  quam  ecclesia  ab  apostolis  accipiens,  in  universo  mundo  offert  Deo:  de  quo  in  12.  Prophetis  Malachias  sic  praesignavit:  Ab  ortu  solis  usque  ad  37