40:578  sicuti  dum  transfert  Deus  imperia,  et  mundum  ipsum  quasi  transformat,  nonne  tunc  magis  affici  nos  decet,  nisi  sumus  nimium  stupidi?  Non  ergo  abs  re  Daniel  hic  corrigit  perversam  opinionem,  quae  occupat  fere  omnium  sensus,  quod  scilicet  vel  mundus  fortuito  volvatur,  vel  quod  natura  sit  summum  numen,  ubi  Deum  esse  asserit  qui  mutat  tempora  et  vices.  Proprie  autem  de  imperiis  loquitur,  sicuti  ex  contextu  satis  patet:  quod  reges  constituat  et  amoveat.  Vix  potest  hoc  nobis  persuaderi,  divinitus  imponi  reges  soliis:  deinde  rursum  deiici:  quia  putamus  vel  sua  industria  consequi  imperium,  vel  iure  haereditario,  vel  fortuito  casu..  Interea  nulla  Dei  habetur  ratio,  dum  sic  extollitur  hominum  industria,  aut  virtus,  aut  felicitas,  aut  aliquid  tale.  Ideo  in  Psalmo  (75,  7)  dicitur,  Neque  ab  oriente,  neque  ab  occasu,  sed  Deus  solus  iudex  est.  Propheta  illic  deridet  sapientum  discursus,  ut  vocant,  qui  colligunt  omnes  rationes,  ut  ostendant  imperia  pervenire  ad  homines  vel  ipsorum  consilio  et  virtute,  vel  felicitate,  vel  aliis  humanis  et  inferioribus  mediis:  Circumspicite,  inquit,  quocunque  libuerit,  sed  ab  ortu  usque  ad  occasum  non  reperietis  cur  unus  aliis  praesit  potius  quam  alter.  Dominus  ergo  solus  est  iudex:  hoc  est,  maneat  gubernatio  penes  unum  Deum.  Sic  etiam  hoc  loco  dicitur  Dominus  constituere  reges,  et  tollere  e  medio  ubi  ita  visum  est.  Hoc  argumentum,  ut  est  splendidum,  posset  copiosius  tractari:  sed  quoniam  aliis  pluribus  locis  recurret  eadem  occasio,  breviter  nunc  perstringo  quod  continet  hic  versus.  Nam  de  statu  regnorum,  et  eorum  ruina  et  mutatione  saepius  dicendum  erit.  Ego  igitur  nolo  congerere  quaecunque  etiam  in  promptu  haberem:  sed  sufficit  mihi  breviter  ostendere  consilium  Danielis.  Postea  addit  ipsum  dare  sapientiam  sapientibus,  et  scientiam  his  qui  praediti  sunt  scientia.  Hoc  secundo  membro  idem  confirmat  propheta,  quod  iam  diximus,  sapientiam  Dei  scilicet  non  latere  in  tenebris,  sed  nobis  manifestari:  quoniam  Deus  quotidie  dat  nobis  certa  eius  et  illustria  documenta.  Et  interim  hic  corrigit  ingratitudinem  hominum  qui  ex  sua  excellentia  trahendo  ad  se  Dei  laudem,  semper  fere  sunt  sacrilegi.  Pronuntiat  igitur  Daniel  non  esse  sapientiam  in  hominibus,  nisi  a  Deo.  Sapiunt  quidem  homines,  pollent  intelligentia  :  sed  quaeritur  an  a  se  ipsis.  Daniel  ergo  ostendit  nimis  malignos  esse  homines,  dum  sibi  quidquam  arrogant,  etiam  si  omnes  rapiant  in  admirationem  sui:  quia  nihil  habent  proprium.  Quis  enim  iactabit  se  proprio  marte  sapere?  Se  peperisse  intelligentiam  qua  praeditus  est?  Quum  ergo  Deus  sit  unicus  autor  et  sapientiae  et  scientiae,  dotes  quibus  homines  ornavit,  adeo  non  obscurant  eius  gloriam,  ut  potius  illustrare  debeant.  Postea  adiungit,  37