40:576  et  robur  etiam  posset  cognosci:  ideo  continuo  post  sequitur,  21.  Et  ipse  (vel,  ipse  est  qui)  mutat  tempora,  et  articulos  temporum:  constituit  reges,  et  amovet  reges:  dat  sapientiam  sapientibus^  et  scientiam  iis  qui  scientiam  cognoscunt  (hoc  est,  iis  qui  pollent  scientia).  Clarius  his  verbis  explicat  Daniel  quod  poterat  esse  obscurum.  Docet  enim  ita  Deum  esse  fontem  sapientiae  et  virtutis,  ut  non  supprimat  apud  se  quod  competit  in  eum  solum,  sed  per  coelum  et  terram  diffundat.  Et  hoc  diligenter  notandum  est.  Videtur  enim  elogium  illud  non  adeo  esse  magnificum,  ubi  Paulus  Deum  affirmat  solum  esse  sapientem  (Rom.  16,  27).  Sed  ubi  reputamus  sapientiam  Dei  nobis  proponi  ante  oculos  sursum  et  deorsum,  tunc  melius  sentimus  quomodo,  et  quo  sensu  pronuntiet  Paulus  Deum  esse  solum  sapientem.  Deus  ergo,  ut  iam  attigi,  non  tenet  inclusam  sapientiam  apud  se,  sed  facit,  ut  defluat  per  totum  mundum.  Summa  autem  huius  versus  est,  quidquid  est  virtutis  et  sapientiae  in  mundo,  hoc  esse  testimonium  divinae  et  virtutis  et  sapientiae.  Haec  est  hominum  ingratitudo,  ubi  aliquid  vel  in  se,  vel  in  aliis  reperiunt  laude  dignum,  statim  hoc  sibi  arrogant:  ita  imminuitur  Dei  gloria,  sed  eorum  pravitate,  ubi  se  proferebat.  Hic  autem  docemur,  adeo  nihil  derogare  sapientiae  et  virtuti  Dei,  quidquid  in  mundo  sapientiae  et  virtutis  conspicitur  ut  potius  magis  illic  refulgeat.  Tenemus  ergo  prophetae  consilium,  nempe  Deum  quasi  in  speculis  ante  oculos  nostros  obiicere  testimonia  potentiae  suae  et  virtutis,  ubi  res  in  mundo  volvuntur,  ubi  homines  pollent  sapientia,  ubi  alii  in  sublime  extolluntur,  alii  autem  concidunt:  sicuti  experientia  docet  non  posse  fieri  vel  humanitus,  vel  aliquo  aequabili  cursu  naturae,  et  summi  reges  ita  cadant,  ut  alii  obtineant  summos  honorum  gradus.  Daniel  ergo  admonet  non  esse  quaerendam  in  coelo  duntaxat  sapientiam  et  virtutem  Dei,  quoniam  in  terra  nobis  apparet,  et  quotidie  utriusque  documenta  sese  offerunt  oculis  nostris.  Videmus  nunc  quomodo  inter  se  cohaereant  isti  duo  versus.  Dixerat  solius  Dei  esse  sapientiam,  nunc  ostendit  non  latere  in  ipso  Deo,  sed  nobis  manifestari,  ut  ita  liceat  familiari  usu  cognoscere,  quidquid  sapientiae  est,  ab  ipso  manare,  et  ipsum  esse  unicum  fontem.  Idem  quoque  de  virtute  sentiendum.  Ipse  igitur  est  qui  mutat  tempora  et  articulos  temporum.  Scimus  hoc  totum  adscribi  fortunae,  quod  mundus  habet  incertas  vices,  ita  ut  aliquid  quotidie  mutetur.  Et  profani  homines  hinc  colligunt  caeco  impetu  omnia  versari:  alii  autem  dicunt  humanum  genus  esse  quasi