35:576  buyons  la  louange  de  nostre  vie,  confessans  qu'il  n'y  a  que  luy  seul  pour  sauver.  La  dessus  il  adiouste  derechef,  Et  nous  chanterons  nos  cantiques  tous  les  iours  de  nostre  vie  en  la  maison  du  Seigneur.  Yci  il  reitere  le  propos  qu'il  avoit  tenu  auparavant:  c'est  ascavoir  qu'il  employeroit  ce  que  Dieu  luy  avoit  donne  de  residu  de  vie,  a  luy  en  faire  recognoissance,  tellement  qu'il  ne  seroit  pas  ingrat:  car  (comme  i'ay  desia  dit)  il  vaudroit  mieux  que'iamais  nous  ne  fussions  nais,  que  de  iouir  des  biens  que  Dieu  nous  fait,  et  cependant  avoir  la  bouche  close,  et  ne  penser  point  a  luy.  Notons  bien  donc  que  ceste  repetition  n'est  point  superflue,  quand  Ezechias  dit  tant  de  fois  que  puis  que  sa  vie  luy  est  prolongee,  il  sera  tant  plus  incite  a  louer  Dieu.  Voyla  pour  un  item.  Or  il  monstre  d'avantage,  que  ce  ne  sera  point  pour  une  bouffee:  comme  beaucoup  pourront  louer  Dieu  d'une  affection  assez  vehemente,  quand  ils  auront  experimente  sa  bonte:  mais  cela  s'escoule  tantost,  et  la  memoire  en  est  perdue,  et  leur  semble  que  c'est  assez  que  pour  un  coup  ils  ayent  testifie  qu'ils  tienent  de  Dieu  le  bien  qu'ils  ont.  Mais  Ezechias  nous  monstre  qu'il  nous  faut  continuer  d'une  droite  perseverance  en  cela:  car  nous  ne  tenons  point  de  Dieu  un  iour  de  nostre  vie  plus  qu'un  autre.  Il  faut  donc  qu'elle  luy  soit  plenement  vouee  et  dediee.  Ainsi  voyans  la  paresse  et  la  froidure  qui  est  en  nous,  apprenons  de  nous  inciter  quand  nous  sentirons  que  nostre  zele  se  refroidit,  de  peur  qu'il  ne  s'esteigne  du  tout.  Esveillons-nous:  Comment?  Si  i'ay  recognu  une  fois  ou  deux  la  grace  de  Dieu,  et  qu'est-ce?  maintenant  la  faut-il  mettre  en  oubli?  et  si  un  mois  durant  i'ay  beni  le  nom  de  Dieu,  et  puis  un  an,  et  deux,  et  trois,  et  que  maintenant  ie  n'y  pense  plus:  et  de  quoy  m'aura  servi  tout  cela,  sinon  de  me  tenir  tant  plus  convaincu  d'hypocrisie,  et  de  monstrer  qu'il  n'y  a  eu  sinon  un  feu  d'estouppes,  qu'il  n'y  a  eu  nulle  constance  ne  fermete?  Si  donc  nous  regardons  bien  a  l'exemple  de  ce  bon  Roy,  chacun  de  nous  sera  mieux  pieque  pour  ne  plus  se  nourrir  en  ceste  paresse,  qui  est  de  nature  en  nous,  et  a  laquelle  nous  sommes  par  trop  enclins.  Quand  il  dit,  En  la  maison  du  Seigneur,  ce  n'est  pas  que  les  louanges  de  Dieu  fussent  encloses  au  Temple  (car  chacun  pourra  louer  Dieu  en  sa  maison,  et  le  doit  faire  aussi)  mais  Ezechias  monstre  que  ce  n'est  point  assez  qu'en  secret  il  loue  Dieu,  mais  qu'il  incitera  les  autres  afin  d'avoir  force  compagnons.  Il  parle  donc  yci  d'un  sacrifice  solennel  de  louange  qu'il  rendra  a  Dieu  en  grande  assemblee.  Et  voyla  pourquoy  aussi  nostre  Seigneur  a  voulu  que  les  siens  s'assemblent:  car  il  pouvoit  bien  nous  instruire  en  particulier,  s'il  eust