20:576  S.  Hic  tabellarius  mihi  a  Musculo  literas  attulit  ex  quibus  cognosces  quid  ad  me  scribat.  Dedit  operam  typographiae.  Quaerit  conditionem,  sed  qua  malit  a  typographiae  laboribus  liberari,  si  qua  fieri  ratione  possit,  quam  illi  pistrino  rursum  alligari.  Ego  vero  non  video  quam  possit  aliam  apud  vos  invenire  conditionem,  si  modo  hanc  invenire  possit.  Apud  nos  nulla  est.  Scribit  Musculus  illum  esse  ex  Germania  inferiori,  quod  ipse  fatetur.  Posset  fortasse  usui  esse  apud  Rhaetos,  quum  probe  (ut  ipse  ait)  linguam  italicam  calleat.  Sed  coelum  illud  se  ferre  posse  negat.  Narravit  Rhaetos  magna  laborare  ministrorum  penuria,  atque  hanc  ob  causam  multis  adhuc  in  locis  missam  retineri.  Queritur  etiam  de  gentis  asperitate  et  barbarie.  Tu  hominem  audies  et  admonebis  de  spe  conditionis  quam  istic  posse  inveniri  intelliges.  Videtur  vir  bonus  et  simplex,  quantum  ex  diuturno  colloquio  quod  cum  illo  habui  potui  coniicere.  Salutant  te  uxor  et  tota  familia.  Vale.  Lausannae  8.  Augu.  *)  Tuus  Petrus  Viretus.  4263.  VIRETUS  CALVINO.  De  negotio  aliquo  Holbraci.  (Ex  autographo  Cod.  Genev.  115,  fol.  66.)  Eximio  Christi  servo  D.  Ioanni  Calvino  Genevensis  ecclesiae  fido  pastori  fratri  et  symmystae  plurimum  observando.  Genevae.  S.  Non  dubito  quin  ad  te  scribat  Hubraquius  ea  de  re  quam  abs  te  cupit  me  etiam  intercessore  impetrari.  Nihilominus  tamen  eius  ad  me  literas  ad  te  mitto,  ex  quibus  cognosces  melius  quid  a  me  postulet.  Ego  vero,  non  solum  quia  ex  tuis  ad  me  literis  satis  intellexi  quam  hoc  ipsum  tibi  hodie  sit  difficile  quod  postulat,  sed  etiam  quia  ipse  difficultates  oculis  intueor,  non  ausim  hac  de  re  te  interpellare.  Scio  enim  nihil  apud  te  opus  esse  intercessoribus  in  causa  quam  ecclesiae  utilem  fore  nosti,  et  cui  tu  potes  tuam  praestare  operam.  Tu  tantum  mone  quid  putes  mihi  esse  Hubraquio  respondendum.  Vale  optime  ac  diutissime.  Lausannae  18.  Augusti.  *)  Tuus  Petrus  Viretus.  4262.  1)  anni  prorsus  incerti.  4263.  1)  anni  incerti.