9:575  575  RESPONSIO  576  iocos  hinc  inde  consarcinans,  quibus  secure  se  fabulari  ostentet.  Ergo  si  me  contempserit,  protinus  sublimi  feriet  sidera  vertice.  Quo  consilio  se  nugari  magnifice  praedicat,  frivola  nescio  quae  dicteria  in  me  iaciendo.  Quid  enim  aliud  facerem?  inquit.  Nempe  magnus  vir  censebitur,  si  per  lusum  et  iocum  nullo  negotio  me  exagitet.  Quid  ergo  sibi  volunt  tot  tragicae  exclamationes,  quibus  coelum  et  terram  invocat?  Nugator,  quod  nomen  vere  tibi  sumpsisti,  si  te  poetica  melodia  delectat,  quomodo  non  in  mentem  venit  illud  Horatii:  Si  vis  me  flere,  dolendum  est?  Neque  enim  satis  convenit,  eum  qui  se  prope  nefando  parricidio  impetitum  fuisse  deplorat,  delitias  sibi  facere,  et  in  sua  pernicie  suaviter  iocari.  Hac  de  causa  etiam  mihi  insultat,  quod  non  omnes  sciant  qua  parte  me  premat  pulcher  calceus.  Quasi  vulgari  proverbio  in  hominem  ab  omni  ostentatione  longe  remotum  temere  proiecto  opprimi  queat  comperta  omnibus  simplicitas.  Postquam  vero  se  tam  bellis  dicteriis  satiavit,  sibi  asciscit  severi  monitoris  et  magistri  partes:  verecunde  tamen:  [pag.  28]  quia  malus  comoedus  praepostere  falsas  personas  inducit.  Mihi  vero  nihil  opus  est  Bucerum,  cuius  nomine  non  minus  pueriliter  quam  improbe  abutitur,  e  coelo  elicere,  qui  scurram  referat  :  quando  mortui  superstites  sunt  literae,  atque  etiam  libri  publice  editi,  ex  quibus  cognoscere  promptum  est  quam  stolide  Balduinus  eius  personam  induerit,  ut  licentiose  in  sua  protervia  insultaret.  Saevo  in  me  probro  iam  invectus  fuerat,  quum  rogaret  ecquo  libertas  communis  reciderit,  si  non  licet  loqui,  nisi  ex  arbitrio  et  formula  unius  alicuius  novi  doctoris.  Omitto  quod  novum  appellat  doctorem,  cuius  responsa  olim  sibi  esse  pro  oraculis  scribebat.  Sed  quam  falso  comminiscatur  hanc  me  servitutem  illis  imponere,  ut  ex  meo  nutu  pendeant,  testes  sunt  qui,  tametsi  libere  a  me  dissentiant,  non  tamen  desinunt  esse  amici.  Invidiosius  quod  sequitur:  Nisi  meis  consiliis  obviam  itum  fuerit,  non  modo  causa,  sed  et  vita  cadendum  esse,  omninoque  pereundum,  si  quid  exciderit  quod  mihi  non  placeat.  Forte  id  ab  ipso  impetravit  Castalio,  tanquam  firmum  amicitiae  pignus,  ut  [pag.  29]  patrocinium  causae  Serveti  susciperet.  Iustas  quidem  ille  poenas  dedit:  sed  an  meo  arbitrio?  Certe  arrogantia  non  minus  quam  impietas  perdidit  hominem.  Sed  quodnam  meum  crimen,  si  Senatus  noster  meo  hortatu,  ex  plurium  tamen  ecclesiarum  sententia,  exsecrabiles  blasphemias  ultus  est?  Vituperet  me  sane  hac  in  parte  Franciscus  Balduinus,  modo  Philippi  Melanchthonis  iudicio  posteritas  mihi  gratitudinem  debeat,  quia  tam  exitiali  monstro  ecclesiam  purgaverim.  Senatum  etiam  nostrum,  sub  cuius  ditione  aliquando  vixit,  perstringat  ingratus  hospes:  modo  idem  Philippus  scripto  publice  edito  testetur  dignum  esse  exemplum  quod