40:575  575  PRAELECTIONES  576  expertus  erat  raram  eius  gratiam,  dum  scilicet  ereptus  fuerat  quasi  a  praesenti  morte.  Postea  adiungit,  cuius.  Relativum  hic  sumitur  pro  causali  particula.  Debet  igitur  sic  resolvi  oratio,  quoniam  eius  est  sapientia  et  robur.  Particulae  quae  adduntur  possunt  valere  ad  confirmationem,  et  possunt  sumi  pro  particula  exclusiva:  quasi  diceret  unum  esse  Deum,  cui  debetur  laus  et  sapientiae  et  virtutis.  Extra  ipsum  vero  frustra  quaeri  utrumque.  Sed  videtur  haec  gratiarum  actio  non  quadrare  ad  rem  praesentem.  Debebat  enim  potius  celebrare  Dei  laudes  Daniel,  quod  ei  patefacta  fuisset  visio,  et  hoc  uno  contentus  esse.  Verum  hic  praedicat  gloriam  Dei  tam  a  potentia,  quam  a  sapientia:  quoniam  ubi  scriptura  vult  discernere  verum  Deum  ab  omnibus  fictitiis,  sumit  haec  duo  principia,  Quod  scilicet  Deus  omnia  gubernet  sua  manu,  et  contineat  sub  imperio  suo.  Deinde,  Quod  nihil  ipsum  lateat.  Haec  non  possunt  separari,  ubi  probanda  est  Dei  maiestas.  Videmus  ut  homines  sibi  quidvis  fabricent,  atque  ita  comminiscantur  innumeros  Deos,  et  distribuant  cuique  proprium  munus,  quia  scilicet  non  possunt  quiescere  in  simplici  unitate,  ubi  de  ipso  Deo  agitur.  Alii  fingunt  nobis  Deum  quasi  dimidium:  et  tales  sunt  omnes  qui  garriunt  de  nuda  praescientia.  Fatentur,  Deo  nihil  esse  absconditum,  sed  ipsum  omnia  praescire:  et  huc  referunt  vaticinia  quaecunque  leguntur  in  scripturis.  Quod  dicunt  verum  est,  sed  interea  valde  imminuunt  gloriam  Dei.  Imo  lacerant  prorsus,  quia  similem  ipsum  faciunt  Apollini,  cuius  olim  officium  fuit  praedicere  res  futuras,  ut  putabant  increduli.  Quum  ergo  quaererent  vaticinia  de  rebus  futuris,  Apollo  hac  virtute  praeditus  erat,  ut  illis  manifestaret  hoc  vel  illud.  Multi  hodie  existimant  talem  esse  Deum,  qui  omnia  praevideat:  interim  vero  vel  dissimulet,  vel  consulto  abstineat  a  mundi  gubernatione.  Denique  praescientia  Dei  illis  frigida  est,  atque  otiosa  speculatio.  Ideo  dixi  eos  spoliare  Deum  altera  parte  gloriae  suae:  ita  quantum  in  ipsis  est,  ipsum  lacerare.  Scriptura  autem  ubi  vult  asserere  Deo  quod  eius  proprium  est,  coniungit  haec  duo  inseparabiliter,  Quod  Deus  omnia  praevideat,  quod  nihil  sit  absconditum  eius  oculis,  deinde,  Quod  constituit  etiam  ipse  quidquid  futurum  est,  gubernet  mundum  suo  arbitrio,  nihil  fortuito  accidat,  sed  eius  moderatione.  Hoc  itaque  principium  nunc  sumit  Daniel,  vel  haec  duo  principia.  Quod  Deus  Israelis  solus  mereatur  nomen  Dei,  quia  penes  ipsum  sit  sapientia,  et  robur.  Meminerimus  ergo  Deum  fraudari  iusta  laude,  ubi  non  retinet  haec  duo  in  solidum,  nempe  quod  omnia  praevideat:  deinde  quod  mundum  gubernet,  ita  ut  nihil  accidat  nisi  ex  eius  arbitrio.  Sed  quia  adhuc  frigidum  illud  esset,  Deo  esse  sapientiam  et  robur,  atque  in  ipso  solo,  nisi  et  sapientia  eius  in  mundo  fulgeret,