35:574  de  Dieu  a  nostre  usage,  et  comment  nous  les  pourrons  faire  profiter.  Voyla  en  somme  ce  que  nous  avons  yci  a  retenir.  Au  reste,  quand  il  est  parle  comment  les  peres  se  doyvent  porter  envers  leurs  enfans,  nous  avons  a  recueillir  en  general  (selon  qu'il  en  a  este  traitte  ci  dessus)  que  ce  n'est  point  assez  si  nous  procurons  que  Dieu  soit  glorifie  durant  nostre  vie,  mais  nous  devons  desirer,  comme  son  nom  est  immortel,  aussi  que  d'aage  en  aage  il  soit  celebre,  et  que  ceux  qui  viendront  apres  nous  gardent  la  pure  religion,  et  que  iamais  le  service  de  Dieu  n'aille  en  decadence,  qu'il  poursuyve  et  s'avance  tousiours,  et  que  la  bonte  de  Dieu  soit  magnifiee  par  tout.  Ceux  qui  ont  des  enfans,  qu'ils  cognoissent  que  Dieu  les  leur  a  commis  en  charge,  et  qu'il  faudra  qu'ils  en  rendent  conte,  sinon  qu'ils  mettant  toute  peine  a.  les  enseigner  a  servir  Dieu.  Car  quand  il  est  dit  que  le  pere  annoncera  a  ses  enfans  la  verite  de  Dieu,  il  nous  faut  tousiours  venir  a  ceste  fin-la.  Pourquoy?  C'est  afin  que  les  enfans  se  fient  en  luy,  qu'ils  l'invoquent,  qu'ils  luy  attribuent  la  louange  de  tous  biens,  qu'ils  se  dedient  et  consacrent  totalement  a*  luy  et  a,  son  obeissance.  Si  donc  les  peres  se  veulent  acquitter  de  leur  devoir,  qu'ils  cognoissent  que  c'est  le  principal  heritage  qu'ils  doyvent  laisser  a  leurs  enfans:  que  s'ils  leur  amassent  des  biens,  et  que  cependant  ils  leur  laschent  la  bride  quand  ils  les  verront  dissolus,  meschans,  profanes,  contempteurs  de  Dieu:  malheur  sur  ce  qu'ils  auront  mis  de  peine  pour  les  avancer  selon  le  monde:  car  ils  les  eslevent  bien  haut  pour  leur  faire  rompre  le  col:  et  leur  cheute  sera  plus  mortelle  quand  ils  auront  force  biens,  et  que  cependant  ils  mepriseront  Dieu  en  sa  doctrine,  la  confusion  en  sera  tant  plus  horrible,  pource  que  leur  ingratitude  sera  moins  excusable.  Que  donc  les  peres  pensent  yci  mieux  qu'ils  n'ont  pas  accoustume  de  faire:  c'est  ascavoir  que  quand  Dieu  leur  donne  des  enfans,  il  les  oblige  a  ceste  charge  qu'ils  s'efforcent  d'autant  plus  a  ce  qu'ils  soyent  instruits  en  sa  verite  pour  tout  le  temps  de  leur  vie:  comme  nous  voyons  aussi  que  l'exemple  nous  en  est  donne  en  Abraham  qui  est  le  pere  des  fideles.  Car  quand  Dieu  veut  monstrer  qu'il  gouvernera  sa  maison  comme  il  appartient,  Celeray-ie  a  mon  serviteur  Abraham  (dit-il)  ce  que  i'ay  a  faire?  non.  Voyla  Dieu  qui  se  rend  familier  a  luy.  Car  (dit-il)  il  enseignera  ses  enfans  en  mes  statuts,  en  mes  loix  et  en  mes  ordonnances.  Voyla  la  marque  dont  les  fideles  sont  discernez  d'avec  les  contempteurs  de  Dieu.  Si  donc  nous  voulons  estre  nombrez  en  l'Eglise,  que  nous  ensuyvions  ce  zele,  et  ceste  affection  d'Abraham:  c'est  ascavoir  que  selon  qu'un  chacun  ha  famille,  il  mette  peine  que  Dieu  y  soit  honore,  et  que  sa  verite  y  soit  tousiours  cognue  iusques  en  la  fin.