40:573  573  IN  DANIELEM.  CAP.  II.  574  acceperit  a  Domino  quod  fideliter  ad  ipsum  perferret,  hinc  fit  ut  rex  concedat  illi  tempus:  et  hoc  clarius  postea  videbimus.  Sequitur,  17.  Tunc  Daniel  in  domum  venit  (abiit)  et  Hananiae,  et  Misaeli,  et  Azariae  sociis  suis  sermonem  (vel,  rem)  patefecit.  18.  Et  misericordias  ad  petendum  (ad  verbum,  hoc  est,  ut  peterent  misericordiam)  a  facie  Dei  coelorum  super  arcano  hoc,  ut  ne  interficerentur  Daniel  et  socii  eius  cum  residuo  sapientum  Babylonis  (hoc  est,  cum  reliquis  sapientibus  Babylonis).  Videmus  quo  consilio,  et  qua  etiam  fiducia,  Daniel  postulaverit  tempus  sibi  dari.  Consilium  hoc  fuit,  ut  Dei  gratiam  imploraret.  Accessit  etiam  fiducia,  quoniam  sciebat  sibi  instare  duplicem  poenam,  si  regis  exspectationem  fuisset  frustratus:  si  postridie  rediisset  vacuus  et  inanis,  non  contentus  fuisset  rex  una  et  simplici  morte,  sed  crudeliter  saeviisset  in  Danielem,  quasi  fuisset  ab  eo  delusus.  Non  dubium  igitur  est  quin  Daniel  speraverit  quod  adeptus  est,  nempe  somnium  regis  sibi  revelatum  iri.  Exponit  ergo  sociis  suis,  ut  simul  postulent  misericordiam  a  Deo.  Iam  antea  pollebat  Daniel  singulari  illo  dono,  quod  erat  somniorum  interpres:  deinde  solus  etiam  erat  Dei  propheta,  quemadmodum  vidimus.  Deus  enim  solebat  prophetis  manifestare  suum  consilium  vel  per  somnia,  vel  per  visiones:  utrumque  adeptus  erat  Daniel.  Quod  ergo  Misael,  Hananiah,  et  Azariah  sese  adiungunt  socios  ad  precandum,  colligimus  non  fuisse  ambitione  inductos,  vel  quod  sibi  aliquid  appeterent.  Nam  si  fuissent  aemuli  Danieli,  non  potuissent  uno  consensu  precari.  Neque  enim  sibi  quisque  privatim  preces  concipit,  sed  tantum  ut  Danieli  patefieret  somnii  interpretatio.  Videmus  ergo  ut  sincere  consentiant  in  suis  precibus,  et  absit  omnis  superbia  et  ambitio,  nec  quisquam  proprium  aliquid  appetat.  Caeterum  hoc  etiam  notatu  dignum  est,  quum  dicuntur  postulasse  misericordiam  a  Deo.  Etsi  enim  hic  non  prodeunt  in  Dei  conspectum  tanquam  rei,  tamen  quia  gratuito  sibi  datum  iri  sperabant  quod  petebant,  ideo  nomen  misericordiae  hic  ponitur.  Quoties  ergo  ad  Deum  confugimus,  ut  necessitatibus  nostris  opem  ferat,  semper  oculi  et  sensus  vertendi  sunt  in  eius  misericordiam.  Mera  enim  eius  liberalitas  nobis  eum  conciliat.  Quod  in  fine  versus  dicitur,  ne  perirent  cum  reliquis  sapientibus  Babylonis,  quidam  ita  exponunt  quasi  solliciti  fuerint  de  vita  magorum,  et  voluerint  etiam  ipsos  eripere  a  morte.  Sed  quanquam  optassent  omnes  salvos,  non  dubium  tamen  est  quin  se  hic  a  magis  et  Chaldaeis  separent,  sicuti  etiam  longe  diversa  erat  ratio.  Iam  sequitur,