9:572  prophetent  in  Dei  castris.  Denique  unum,  si  potest,  nominet  obtrectator,  quem  invidia  aut  aemulatione  moratus  sim,  quo  minus,  si  fieri  posset,  collegae  etiam  gradu  esset  superior.  Ita  per  se  evanescit  puerile  de  summo  pontificatu  cavillum:  ac  si  non  semper  tam  ex  animo  quam  ex  professo  defugere  studuerim  quidquid  me  extra  modestiae  fines  abriperet.  Sed  quid  hoc  sibi  vult,  dum  me  securum  [pag.  20]  esse  iubet,  si  non  alium  habeo  quam  ipsum  vel  rivalem  vel  competitorem  maximi  sacerdotii?  Si  tam  insulse  nugari  libebat,  saltem  a  praefatione  tam  male  consentanea  abstinere  debuit.  Valeant,  inquit,  ineptiae.  Exspectes  aliquid  grave  et  serium.  Mox  omnes  ineptias  superat,  denunciasse  scilicet  non  esse  timendum  ne  me  deiiciat  e  gradu.  Et  quis  suspicatus  esset  hominem  nihili  tantum  sibi  arrogare,  nisi  se  ipsum  proderet?  Eat  nunc  et  buccas  inflet  inani  iactantia.  Si  ambitiosus  essem,  inquit,  nunc  demum  putarem  me  esse  aliquid.  Paedagogia  scilicet  fraudulenter  elicita  eum  extulit  supra  nubes,  ut  reliquos  omnes  contemptim  despiciat.  Interea  quidem  stolida  eius  ambitio  risum  omnibus  movere  potest.  Severe  mecum  expostulat,  quod  non  pietatis  modo,  sed  humanitatis  quoque  in  ipso  lacessendo  oblitus  fuerim.  Quid  per  sua  erga  me  officia  intelligat,  non  assequor.  Fateor  fuisse  mihi  familiarem:  quum  signa  melioris  ingenii  daret,  hospes  apud  me  fuit.  Serpentem  scilicet  ac  pestem  domi  meae  alui.  Hoc  vero  praetextu  quod  me  sibi  vult  esse  obstrictum,  ex  quo  iure  hauserit,  nescio.  Ultra  progreditur:  me  atrociores  [pag.  21]  mereri  poenas  quam  Orestem,  qui  matrem  aliqua  causa  incitatus  occidit  :  quod  saevus  magister  insontem  et  inauditum,  veteremque  discipulum,  et  prope  filium,  non  equis,  ut  infelix  pater  Hippolytum,  sed  stylo  meo  discerpserim.  Obliquas  strophas  omitto,  in  quibus  facetum  se  fore  putavit:  quod  me  suum  fuisse  praeceptorem  significem,  et  ipso  discipulo  aut  filio  glorier.  Ego  vero  si  quid  in  eum  iuris  unquam  vendicare  mihi  potui,  libenter  remitto:  quia  cum  Satana,  cui  se  totum  addixit,  mihi  nihil  est  commune.  Sed  ex  eius  literis  agnoscent  lectores,  si  nunc  immaniter  contra  me  ferociat,  ingratitudinis  culpam  in  eo  residere.  Agedum  vero  insontem  se  probet:  sicuti  audacter  facturum  minatur.  Ego  autem  simpliciter  excuso,  quoniam  non  modo  perfidiose  mecum  agendo,  sed  nunc  insidiis,  nunc  aperto  conatu  in  communem  ecclesiae  perniciem  grassando  spem  meam  sceleste  fefellerit,  eo  iustiores  mihi  fuisse  iracundiae  causas,  quam  in  exterum  quemlibet  vel  ignotum.  Quod  si  humano  more  de  me  conquestus  esset,  forte  eadem  spe  quae  me  frustrata  erat  iterum  deceptus  optassem  de  vehementia  aliquid  remissum.  Nunc  vero  quum  [pag.  22]  beluina  eius  rabies  perditae  et  desperatae  mentis  signum  sit  non  obscurum,  dicere