5:572  dement  de  Dieu,  ne  sont  pas  services  divins,  selon  ceste  sentence:  C'est  en  vain  qu'on  me  honnore  par  commandemens  des  hommes.  A  ce  qu'on  allegue,  que  Dieu  comme  iuste  iuge  punist  les  pechez:  il  est  vray  que  Dieu  punist  mesme  les  esleux.  Premierement,  par  contrictions  et  horreurs  de  conscience  ,  desquelz  parle  David,  disant:  Seigneur  ne  m'argue  point  en  ta  fureur.  Et  Ezechiel:  Comme  un  lyon  il  a  brise  tous  mes  oz.  Ces  terreurs  sont  plus  vrayement  peines,  que  des  pleurs  telz  quelz  de  satisfaction.  Secondement  Dieu  punist  de  peines  specialles,  plusieurs  faultes  de  ceulx,  qui  se  sont  retournez  a  luy,  comme  l'adultere  de  David.  Et  telles  peines  ordonnees  de  Dieu,  sont  tousiours  sur  les  Sainctz:  comme  le  Pseaulme  dict  des  esleuz:  Ie  visiteray  leurs  iniquitez  par  verges.  Item,  le  iugement  commence  a  la  maison  du  Seigneur:  car  Dieu  chastie  les  siens,  affin  que  toute  nonchalance  [fol.  72]  charnelle  soit  purgee  en  eulx  et  que  la  crainte  de  son  Nom,  la  repentance,  la  foy,  et  l'invocation,  soyent  augmentees.  Combien  que  toutes  les  afflictions,  ne  soyent  point  peines  de  certains  crimes  ;  comme  tousiours  la  fleur  de  l'Eglise,  les  Prophetes,  les  Apostres  et  aultres  personnages  excellens,  qui  ont  endure  grandes  calamitez,  par  singuliere  providence  de  Dieu.  Car  il  veult  que  son  Eglise  non  seulement  soit  subiette  en  ceste  vie  aux  miseres  qui  s'ensuyvent  communement  en  tous  de  la  premiere  cheute  d'Adam:  mais  veult  aussi  qu'elle  soit  exercee  speciallement  pour  plusieurs  causes.  La  multitude  des  meschans  ne  recongnoist  point  le  peche,  ne  l'ire  de  Dieu,  mais  comme  il  est  dict  en  Genese  :  le  peche  se  repose  en  eux  iusques  a  ce,  qu'il  sera  revelle:  c'est  a  dire,  il  ne  les  espouvante  pas  iusques  a  ce,  qu'ilz  en  sentiront  les  peines.  L'Eglise  donc  est  chastiee  par  dessus  tous  les  aultres,  affin  de  recongnoistre  ses  pechez  et  la  corruption  enracinee  en  nostre  nature,  et  prouffiter  en  la  craincte  de  Dieu  et  en  penitence.  Il  y  a  aussi  une  aultre  cause,  c'est  que  s'il  n'y  avoit  des  perilz  et  grandes  batailles,  la  foy  et  l'invocation  languiroyent.  Pour  ceste  cause  l'Eglise  est  exercee  en  beaucoup  de  batailles.  Comme  il  est  escript  en  Genese,  le  serpent  mordra  son  talon,  les  fideles  sentent  ses  morsures  bien  aigres  et  bien  poignantes,  en  plusieurs  sortes,  en  tentations  diverses  et  afflictions.  Et  est  la  propre  sagesse  de  l'Eglise,  d'entendre  que  Dieu  veult  humilier  les  Sainctz  et  les  faire  semblables  en  ceste  vie  mortelle  a  l'image  de  Christ.  Item,  qu'il  regarde  sur  les  affligez,  comme  sainct  Pierre  exhorte:  Humiliez  vous  soubz  la  main  puissante  du  Seigneur.  Ceste  puissance  est  puissamment  declairee  de  Dieu  en  l'une  sorte  et  en  Paultre.  Il  chastie  les  nonchallans,  comme  David,  Sanson  et  Nabuchodonozor.  D'aultre  part,  il  redresse  puissamment  ceux  qui  font  penitence  et  invocquent