48:572  penes  ipsos  obediendi  sit  facultas.  Nam  etsi  nos  latet  ratio  cur  Deus  caecis  appareat  et  surdis  loquatur:  sola  tamen  eius  voluntas,  quae  omnis  iustitiae  regula  est,  instar  mille  rationum  nobis  esse  debet.  In  clausula  breviter  notandum  est,  quis  sit  salutaris  verbi  Dei  effectus:  nempe  hominum  conversio:  quae  non  modo  sanitatis  principium  est,  sed  resurrectio  quaedam  a  morte  in  vitam.  28.  Notum  ergo  sit.  Ne  postea  defectionis  ipsum  accusent  Iudaei,  quod  sancto  Abrahae  genere  relicto  ad  profanas  gentes  se  conferat:  quod  toties  testatum  erat  a  prophetis  denuntiat,  salutem,  cuius  proprii  vel  saltem  primarii  erant  haeredes,  ad  exteros  transferendam.  Quod  tamen  dicit  salutare  missum  gentibus,  intelligit  secundo  loco:  postquam  scilicet  repudiatum  erat  a  Iudaeis:  sicuti  supra  fusius  tractavimus.  Ergo  sensus  est,  non  esse  cur  querantur  Iudaei  admitti  gentes  in  possessionem  vacuam,  ubi  ab  illis  deserta  fuerit.  Neque  etiam  quum  gentes  dicit  audituras,  fidem  singulis  sine  exceptione  communem  facit.  Satis  enim  expertus  fuerat  quam  multi  etiam  ex  gentibus  impie  Deo  resisterent.  Sed  quotquot  ex  gentibus  credebant,  Iudaeis  incredulis  opponit,  ut  hos  ad  zelotypiam  provocet:  sicuti  habetur  in  cantico  Mosis  (Deut.  32,  21).  Interea  significat,  doctrinam,  quae  ab  illis  respuitur,  alibi  fore  non  inutilem.  29.  Multam  inter  se  disceptationem.  Non  dubium  quin  magis  impios  exasperaverit,  quod  in  eos  protulit  vaticinium.  Adeo  enim  obiurgationibus  non  mitescunt,  ut  se  acrius  ad  furorem  inflamment.  Haec  ratio  est  cur  disceptaverint  a  Paulo  egressi,  quod  maior  pars  acquiescere  nollet.  Sed  quum  hinc  inde  disputatum  fuerit:  apparet  quosdam  ita  amplexos  quae  dicta  erant  a  Paulo,  ut  non  dubitaverint  tueri  et  fortiter  asserere  quod  crediderant.  Caeterum  frustra  inde  quispiam  obiiciet,  contentionum  semen  esse  evangelium  Christi,  quas  non  nisi  ex  hominum  pervicacia  provenire  constat.  Atque  omnino,  ut  pace  cum  Deo  fruamur,  cum  eius  contemptoribus  bellare  necesse  est  30.  31.  Suscipiebat  omnes.  Insigne  constantiae  documentum  praebuit  sanctus  apostolus,  quod  se  omnibus  qui  audire  ipsum  cuperent,  tam  simpliciter  obtulit.  Certe  non  ignarus  erat  quantum  sibi  invidiae  conflaret:  atque  hoc  optimum  esse  compendium,  si  tacendo  adversae  partis  odia  placaret.  Neque  enim  id  agendum  fuit  homini  provido,  qui  sibi  privatim  cavere  vellet.  Sed  quia  meminerat,  se  non  minus  in  carcere  esse  Christi  apostolum  et  evangelii  praeconem  quam  si  liber  ac  solutus  foret,  nemini  ad  discendum  parato  se  subducere  fas  esse  duxit,  ne  occasionem  sibi  divinitus  oblatam  negligeret.  Atque  ideo  pluris  illi  fuit  sancta  Dei  vocatio  quam  propriae  vitae  cura.  Ut  autem  sciamus  vo-