40:572  cum  rege,  quia  non  fuerit  vocatus,  vel  auditus,  et  mactetur  una  cum  aliis,  perinde  ac  si  in  eadem  esset  culpa,  etiam  si  cui  culpae  obnoxii  fuissent  Chaldaei.  Summa  est,  non  esse  cur  rex  acceleret,  quia  forte  inveniet  quod  cupit,  modo  inquirat  diligentius.  Postea  additur,  Arioch  exposuisse  rem  Danieli.  Unde  apparet  Danielem  antehac  fuisse  ignarum  totius  negotii.  Et  hinc  etiam  coniicere  promptum  est,  quantus  terror  occupaverit  animum  pii  viri.  Nihil  enim  sciverat,  et  quasi  noxius  ad  supplicium  repente,  et  praeter  opinionem  trahitur.  Ergo  oportuit  illum  divinitus  confirmari,  ut  posset  composito  animo  petere  tam  a  praefecto  ipso,  quam  a  rege  tempus,  quo  posset  regi  somnium  narrare,  et  etiam  adiungere  eius  interpretationem.  Quod  ergo  Daniel  potuit  ita  composite  agere,  fuit  singulare  Dei  beneficium,  quia  terror  eius  animum  obstupefacere  alioqui  poterat.  Et  scimus  in  rebus  subitis  destitui  nos  omni  consilio,  et  facile  animis  concidere.  Ubi  ergo  nihil  tale  in  Daniele  cernitur,  certum  est  eius  mentem  gubernatam  fuisse  a  spiritu  Dei.  Postea  additur,  16.  Et  Daniel  ingressus  est,  et  postulavit  a  rege,  ut  tempus  daret  sibi,  et  expositionem  (interpretationem)  afferret  regi.  Nihil  hic  versus  novum  continet,  nisi  quod  hoc  notandum  est,  quod  non  exprimitur,  nempe  praefectum  non  sine  metu  hoc  dedisse  Danieli,  ut  introduceret  eum  ad  regem.  Sciebat  enim  regem  prorsus  furere.  Ergo  fuit  hoc  odiosum,  quod  non  statim  exsequutus  esset  edictum.  Sed,  ut  iam  dictum  fuit,  quia  Deus  susceperat  Danielem  in  fidem  suam,  ideo  flexit  ad  hanc  mansuetudinem  animum  praefecti,  ut  non  dubitaret  Danielem  ad  regem  introducere.  Iam  alterum  etiam  colligitur  ex  contextu,  nempe  Danielem  quod  petebat  impetrasse.  Dicitur  enim  domum  fuisse  reversus:  haud  dubie  quia  diem  unum  a  rege  obtinuit  :  quo  posset  postridie  satisfacere  eius  voto.  Et  tamen  mirum  est  hoc  illi  fuisse  datum:  quia  voluerat  rex  extemplo  somnium  sibi  narrari.  Quanquam  autem  hic  diserte  non  exprimit  Daniel  quas  rationes  coram  rege  attulerit:  probabile  tamen  est,  confessum  fuisse  quod  postea  videbimus  suo  loco,  nempe  se  non  esse  praeditum  tanta  intelligentia,  ut  somnium  exponeret  :  verum  sperare  Dei  beneficio,  se  prostridie  venturum  cum  nova  revelatione.  Alioqui  rex  nunquam  eum  admisisset,  si  dubitanter  petiisset  Daniel,  vel  non  fuisset  testatus  se  arcanam  a  Deo  revelationem  sperare,  statim  fuisset  reiectus,  et  provocasset  etiam  magis  iracundiam  regis.  Et  Hebraeis  tritum  est  quae  suo  loco  omittunt  postea  in  contextu  persequi.  Ubi  autem  modeste  fatetur  quod  verum  est,  se  non  posse  regi  morem  gerere,  donec