20:572  gloriam  ecclesiaeque  salutem  faciat  quam  uxorium  amorem,  quum  sine  illis  hic  ne  felix  quidem  esse  possit.  Uberrimos  copiosissimosque  fructus  ex  hac  speramus  peregrinatione:  obstructum  iri  os  impium  Cardinalis  istius  caeterorumque  asseclarum,  qui  alienant  a  nobis  principum  hominumque  animos,  quod  nos  dicant  demolitos  ecclesiam,  itaque  iacere  in  ruinis  et  ruderibus  ecclesiae,  sibi  quemque  religionem  fingere,  tot  paene  haereses  sectasque  esse  quot  sumus  homines.  Deinde  regem  necesse  est  in  hanc  sententiam  descendere,  se  frustra  huic  potentiae  repugnare  quae  totum  orbem  christianum  pervaserit  et  occuparit  iam  totum  fere  ipsius  regnum,  et  tantos  principes  irritare  tamque  potentes  nationes  periculosum  esse,  quas  solus  de  Imperatore  metus  adiungat  modo  sibique  conciliet.  Deinde  non  despero  iactum  iri  fundamentum  foederis  inter  principes  christianos,  qui  tametsi  mente  et  voluntate  coniuncti  sunt,  quia  tamen  suis  quisque  rebus  prospicit,  nec  fit  communis  foederis  a  quoquam  initium,  distracti  paene  sunt  inter  se  et  separati.  Sed,  quod  me  valde  recreat,  probabimus  omnibus  unicum  esse  locum  ecclesiae  Dei  etiam  magnis  locorum  intervallis  dissitae,  instrui  nos  una  doctrina  quemadmodum  una  veritas  est,  quae  res  conciliabulum  Romanense  valde  terrebit,  qui  nos  dum  singuli  profitemur  religionem  despiciunt,  ubi  idem  sentire  omnes  intelligent,  et  quibuscum  sibi  res  sit,  ad  alias  artes  confugere  necesse  fuerit.  Hic  etiam  consensus  turbulentorum  hominum  ambitionem  compescet  qui  novas  subinde  haereses  moliuntur,  tuebiturque,  ut  spero  de  Dei  bonitate,  multa  saecula  integram  sanamque  doctrinam  evangelii.  Praeterea  non  parvi  refert  convenire  in  unum  concilium  christianos  doctores  et  disciplinam  in  ecclesia  aliquam  constituere  morum  doctrinaeque  conservatricem.  Atque  utinam,  quemadmodum  unum  corpus  sumus  in  Christo  Iesu,  unis  caeremoniis  quasi  unico  amictu  sed  pretioso  vestiamur,  in  re  praesertim  sacramentaria.  Postremo,  quod  negligendum  non  est,  infensus  Genevae  ea  potissimum  de  causa  princeps  noster  est,  quod  existimet  sentir  nam  et  cloacam  esse  haeresium  omnium.  Nec  minae  ignotae  vobis  sunt.  Qui,  si  viderit  consensionem  doctrinae  et  conspirationem  tot  bellicosarum  gentium  in  ea  defendenda,  formidabit.  Habes,  mi  pater,  quae  mihi  videtur  Dominus  Deus  noster  polliceri  nobis:  tu  singula  pro  tua  prudentia  perpendes,  et  qua  ratione  attentandum  quodque  erit  edocebis  amplissime,  sigillatim  de  Geneva,  num  velis  commendari  principibus,  ut  adversus  minas  adversariorum  universa  Dei  armatura  utamur,  ut  propugnacula  urbis  non  septis  Alpium  sed  finibus  orbis  contineantur.  Sed  celeritatem  res  desiderat,  dum  res  incertae  regem  nonnihil  coercent,  ne  desaeviat  in  nos  effundatque  quae  se  non