48:570  tam  habentes  inter  se  disceptationem.  30.  Mansit  autem  Paulus  biennio  toto  in  suo  conducto,  et  suscipiebat  omnes,  qui  ingrediebantur  ad  ipsum,  31.  praedicans  regnum  Dei,  ac  docens  quae  sunt  de  Domino  Iesu  cum  omni  fiducia,  nemine  prohibente.  25.  Inter  se  discordes.  Hoc  efficit  infidelium  malitia  et  pravitas,  ut  Christus,  qui  pax  est  nostra  et  unicum  sanctae  unitatis  vinculum,  dissidii  sit  occasio,  et  in  certamen  committat,  qui  prius  mutuam  inter  se  amicitiam  colebant.  Ecce  enim  dum  ad  Paulum  audiendum  conveniunt  Iudaei,  idem  omnibus  sensus,  eadem  vox  :  profitentur  omnes  se  legem  Mosis  amplecti.  Audita  reconciliationis  doctrina,  exoritur  inter  eos  dissentio,  ut  in  diversas  partes  scindantur.  Neque  tamen  putandum  est  ab  evangelii  praedicatione  incipere  discordiam:  sed  simultas,  quae  prius  in  cordibus  malignis  latebat,  tunc  demum  emergit.  Sicuti  novos  colores  non  inducit  solis  fulgor:  sed  discrimen,  quod  in  tenebris  nullum  erat,  palam  aperit.  Ergo  quum  peculiariter  electos  suos  Deus  illuminet,  nec  fides  omnium  sit  communis,  meminerimus  fieri  aliter  non  posse,  quin  oblato  in  medium  Christo,  alii  ab  aliis  discedant.  Sed  tunc  in  mentem  veniat  impleri  quod  de  ipso  praedixit  Simeon,  contradictionis  scopum  esse,  ut  retegantur  ex  multis  cordibus  cogitationes:  et  incredulitatem^  quae  Deo*  rebellis  est,  esse  dissidii  matrem.  Postquam  dixisset  Paulus.  Principio  leniter  et  placide  eos  allicere  conatus  est.  Nunc  eorum  obstinatione  comperta  acrius  insurgit,  Deique  iudicium  severe  denuntiat.  Sic  enim  tractandi  sunt  rebelles,  quorum  superbia  domari  simplici  doctrina  non  potest.  Eadem  etiam  nobis  tenenda  est  ratio,  ut  dociles  et  mansuetos  blande  regamus:  praefractos  autem  citemus  ad  Dei  tribunal.  Quod  spiritum  sanctum  loquentem  inducit  potius  quam  prophetam,  ad  fidem  oraculi  valet.  Nam  quum  Deus  se  unum  audiri  postulet,  non  aliter  potest  constare  doctrinae  autoritas,  quam  si  ab  eo  sciamus  profectam  esse,  non  in  hominum  capite  natam:  deinde  subindicat  non  unius  tantum  saeculi  pervicaciam  illic  notari,  sed  in  futurum  tempus  extendi  spiritus  oraculum.  26.  Vade  ad  populum  istum.  Celebris  est  hic  locus,  quia  sexies  citatur  in  novo  testamento.  Sed  quia  alibi  in  alium  finem  adducitur,  tenendum  est  quo  consilio  Paulus  ad  praesentem  causam  accommodet.  Nempe  voluit  hoc  quasi  malleo  contundere  impiorum  duritiem:  fidelibus  autem,  qui  teneri  adhuc  et  debiles  erant,  addere  animos,  ne  ipsos  turbaret  aliorum  incredulitas.  Summa  igitur  est,  impleri  quod  praedictum  fuerat  a  propheta:  ideoque  non  esse  cur  sibi  reprobi  placeant,  vel  fideles  quasi  re  nova  et  insolita  terreantur.  Quamquam  autem  certum  est  excaecationem,  cuius  meminit  propheta,  iam  eius  aetate  coepisse:  Ioannes  tamen  admonet,