40:570  test,  ut  Nebuchadnezer  tunc  in  re  tam  seria  subolfecerit  imposturas,  quarum  nulla  ante  cognitio  in  eius  animum  subierat:  nunc  autem  ubi  videt  se  fuisse  deceptum,  et  simul  destituitur  in  re  tam  perplexa  et  in  tanta  anxietate  eorum  consilio  a  quibus  omnia  speraverat,  tunc  centuplo  magis  insanit,  quam  si  antehac  fuisset  temperatus.  Postea  sequitur,  13.  Et  edictum  exiit:  et  sapientes  interficiebantur:  et  quaerebant  Danielem  et  socios  eius  ad  interficiendum.  14.  Et  tunc  Daniel  sciscitatus  est  (de)  consilio  et  edicto  ab  Arioch  principe  satellitum  regis,  qui  exierat  ad  interficiendum  sapientes  Babylonis.  15.  Respondit,  et  dixit  ipsi  Arioch  praefecto  (est  idem  nomen  quod  paulo  ante  vidimus,  praefecto)  regis,  Ad  quid  edictum  festinat  e  conspectu  regis?  Tunc  rem  (vel,  sermonem)  patefecit  Arioch  ipsi  Danieli.  Ex  verbis  apparet  quosdam  ex  sapientibus  fuisse  interfectos.  Neque  enim  Daniel  primo  loco  ad  mortem  quaesitus  est.  Quum  ergo  promiscue  traherentur  ad  supplicium  magi  et  Chaldaei,  Daniel  etiam  cum  sociis  in  eodem  fuit  periculo.  Et  diserte  hoc  exprimitur,  quod  scilicet  edictum  exierit,  hoc  est,  publicatum  fuerit  (sic  etiam  Latini  interdum  loquuntur)  et  interficiebantur  sapientes:  Daniel  tunc  quoque  fuit  quaesitus:  rex  autem  nunquam  passus  esset  edictum  suum  contemni  a  promulgatione.  Si  publice  mandasset  hoc  fieri,  et  nulla  fuisset  adiuncta  exsequutio,  nonne  hoc  erat  ridiculum?  Colligitur  ergo  probabili  ratione,  multos  ex  magis  et  Chaldaeis  fuisse  interfectos.  Etsi  autem  non  fuit  legitima  causa  regi:  dederunt  tamen  iustas  poenas.  Nam  (ut  heri  dictum  fuit)  digni  erant  qui  exterminarentur  e  mundo:  et  pestis  illa  tollenda  est,  quoad  fieri  potest.  Si  Nebuchadnezer  fuisset  similis  vel  Davidi,  et  Ezechiae,  vel  Iosiae,  optimo  iure  interficere  omnes  poterat,  et  purgare  terram  tali  inquinamento.  Sed  quia  tantum  iracundiae  fervore  illuc  rapitur,  delinquit  ipse.  Interea  Deus  sumit  iustam  poenam  de  Chaldaeis.  Et  debuit  etiam  prodesse  haec  admonitio  toti  populo.  Quia  autem  obduruerunt  in  suo  errore,  non  dubium  est  quin  redditi  sint  magis  inexcusabiles,  quod  caecutirent  ad  tale  Dei  iudicium.  Quod  autem  Daniel  simul  etiam  morti  destinatur,  quum  a  rege  non  fuerit  vocatus,  hinc  apparet  quam  iniqua  sint  regum  edicta,  qui  gravantur  inquirere,  ut  decebat,  de  causis  quarum  sunt  iudices.  Nebuchadnezer  saepius  audierat  Danielem,  et  coactus  fuerat  mirari  dexteritatem  ingenii  in  ipso,  et  singulare  sapientiae  donum:  Qui  fit  igitur,  ut  eum  praetereat,  ubi  opus  est  singulari  consilio?  Quanquam  ergo  rex  solii-