35:570  pourquoy  nostre  Seigneur  nous  donne  des  miroirs  de  nostre  fragilite,  quand  nous  voyons  que  les  plus  saincts  et  les  plus  parfaits  parlent  ainsi,  mais  cependant  Dieu  a  supporte  Ezechias,  pour  ce  que  le  principal  luy  demeuroit:  comme  desia  nous  avons  veu  que  son  but  tendoit  la,  de  glorifier  le  nom  de  Dieu  :  car  il  eust  mieux  aime  mourir  cent  fois,  que  d'estre  une  minute  en  ce  monde,  en  profanant  par  ingratitude  les  biens  que  Dieu  luy  faisoit.  Yoyla  donc  Ezechias  qui  retient  ceste  regle,  que  les  hommes  ne  doyvent  point  appeter  un  seul  iour  de  vie,  sinon  afin  que  Dieu  en  soit  glorifie.  Mais  cependant  ce  qu'il  est  agite  de  si  grans  troubles  qu'il  ne  peut  pas  distinctement  parler  comme  il  deveroit,  cela  procede  de  son  infirmite,  laquelle  Dieu  excuse  et  supporte:  car  ce  n'est  pas  une  desobeissance,  d'autant  qu'il  y  a  en  nos  oraisons  beaucoup  de  choses  extravagantes.  Il  est  vray  qu'il  nous  faut  tousiours  conformer  a  ceste  regle  qui  nous  est  donnee,  afin  que  chacun  ne  prie  point  Dieu  a  l'aventure  et  selon  son  appetit.  Mais  quoy  qu'il  en  soit,  si  est-ce  que  nous  aurons  des  regrets  et  complaintes  en  nous  qui  excederont  mesure:  et  il  faut  que  Dieu  ait  pitie  de  nous  en  cest  endroit.  Voyla  donc  en  somme  ce  que  nous  avons  a  retenir:  c'est  que  sur  tout  en  vivant  nous  tendions  tousiours  a  ceste  fin  que  Dieu  soit  honore.  Car  c'est  aussi  pourquoy  il  nous  a  mis  en  ce  monde,  c'est  pourquoy  il  nous  a  choisis  pour  estre  de  son  troupeau,  c'est  ascavoir  afin  que  nous  soyons  assemblez  pour  chanter  ses  louanges  d'un  accord.  Et  nous  voyons  cela  encores  mieux  au  Pseaume  cent  quinzieme,  la  ou  il  y  a  une  pareille  sentence.  Et  mesmes  ce  n'est  pas  seulement  un  homme  qui  parle,  mais  tout  le  corps  de  l'Eglise  des  fideles,  lesquels  disent  qu'on  ne  louera  point  Dieu  en  la  mort:  mais  nous  vivans,  disent-ils,  iusques  en  la  fin  nous  confesserons  que  Dieu  nous  a  conservez.  La  il  nous  est  signifie  que  Dieu  iusques  en  la  fin  du  monde  gardera  tousiours  son  Eglise,  et  qu'il  y  aura  quelque  peuple  de  residu.  Pourquoy?  D'autant  qu'il  veut  estre  cognu  pere  et  sauveur  entre  les  hqmmes:  et  combien  que  ce  ne  soit  pas  de  la  plus  grande  multitude,  si  veut-il  encores  avoir  quelque  compagnie  qui  le  benisse.  Ainsi  donc  apprenons  de  nous  exercer  a  benir  le  nom  de  Dieu,  cependant  qu'il  nous  tient  yci  bas,  et  que  nous  sommes  nourris  par  sa  liberalite,  et  (qui  plus  est)  qu'il  nous  a  appellez  a  soy  pour  tendre  tousiours  a  l'esperance  de  l'heritage  eternel.  Puis  qu'ainsi  est  donc,  applicquons  toute  nostre  estude  a  cela,  voire  tout  le  temps  de  nostre  vie.  Que  si  nous  en  faisons  autrement,  il  vaudroit  mieux  que  nos  meres  nous  eussent  avortez,  ou  que  la  terre  s'ouvrist  pour  nous  engloutir,  que  d'estre  yci  gourmandans  comme  bestes  brutes,  et  demeurer  ingrats  de  tant  de  bene-