32:570  un  bon  heritage  et  excellent  quand  i'auray  cestuy-  ci.  Or  maintenant  nous  voyons  quelle  est  la  somme  de  ce  premier  verset:  il  reste  d'en  recueillir  telle  doctrine  comme  elle  y  est  contenue.  Car  quand  nous  oyons  David  ainsi  parler,  il  n'y  a  nulle  doute  que  l'Esprit  de  Dieu  ne  nous  monstre  ou  c'est  qu'un  chacun  se  doit  asseurer  pleinement.  Et  pour  ce  faire,  il  faut  regarder  aux  souhaits  desquels  nous  sommes  allechez  selon  nostre  nature,  que  l'un  s'adonnera  a  ambition,  l'autre  a  son  avarice,  l'autre  a  paillardise.  Tellement  que  les  hommes  sont  esgarez  en  leurs  appetits,  ainsi  que  nous  avons  declare  par  cy  devant.  Or  il  faut  donc  que  nous  soyons  retirez  de  toutes  ces  cupiditez  vaines  et  perverses,  et  bataillions  a  l'encontre  de  tout  ce  qui  nous  empesche  de  venir  a  Dieu:  et  quand  nous  aurons  ainsi  abbatu  nos  passions  et  cupiditez  charnelles,  alors  nous  ne  demanderons  sinon  que  Dieu  nous  attire  a  soy,  qu'il  nous  y  conioigne,  et  qu'il  nous  face  la  grace  que  nous  puissions  garder  ses  paroles.  Mais  il  nous  faut  noter  quant  et  quant,  que  David  parle  yci  d'une  conclusion  qu'il  avoit  prinse  toute  certaine,  et  non  pas  de  quelque  mouvement  vollage:  comme  quelques  fois  nous  aurons  un  desir  d'aller  a  Dieu,  mais  cela  ne  dure  point:  et  aussi  la  chair  nous  aiguillonne  de  l'autre  coste,  et  nous  destourne  du  bien  auquel  nous  eussions  volontiers  tendu.  Ce  n'est  point  donc  assez  que  nous  ayons  quelque  desir,  lequel  se  refroidisse  tantost,  ou  bien,  lequel  soit  amorty  par  les  tentations  contraires:  mais  il  faut  que  nous  prenions  une  conclusion  ferme,  comme  David  parle  yci,  Tay  propose,  dit-il.  Il  met  le  mot  de  Dire,  mais  les  Hebrieux  le  prennent  pour  se  resoudre,  pour  estre  la  ferme  en  un  propos,  afin  de  ne  point  varier.  Or  (en  somme)  notons  que  cependant  que  les  hommes  s'adonnent  aux  choses  terriennes,  qu'ils  ne  font  que  vaguer:  qu'ils  ne  cognoissent  pas  ou  consiste  leur  felicite,