50:57  57  CAPUT  IV.  53  ad  confessionem  aptari  debet,  non  ad  fidei  unitatem.  Tel  si  mavis,  cohaeret  cum  sequentibus,  non  cum  praecedentibus,  hoc  modo:  Quia  nobis  fides  certa  beatae  resurrectionis  constat,  audemus  loqui  et  praedicare  quod  credimus:  quemadmodum  scriptum  est:  Credidi,  propterea  loquutus  sum.  Est  autem  initium  Psalmi  116,  ubi  David  fatetur,  quum  in  ultimas  angustias  redactus  foret,  ita  se  fuisse  perculsum  ut  propemodum  labasceret:  verum  mox  resumpta  fiducia  ex  hac  tentatione  eluctatum  esse.  Inde  itaque  Psalmum  orditur:  Credidi,  propterea  loquar.  Confessionis  enim  mater  est  fides.  Paulus  quidem  ad  eius  imitationem  se  animans  Corinthios  ut  idem  faciant  hortatur:  ac  iuxta  vulgatam  translationem  praeteritum  posuit  loco  futuri:  sed  nihil  refert.  Tantum  enim  hoc  vult,  fideles  debere  magnanimos  esse  et  intrepidos  ad  confitendum,  quod  corde  crediderunt.  Viderint  iam  nostri  pseudonicodemi  quale  figmentum  loco  fidei  sibi  fabricent,  quum  fidem  intus  sepultam  manere  volunt  et  prorsus  mutam:  hacque  sapientia  gloriantur,  si  tota  vita  nullum  rectae  confessionis  verbum  edant.  15.  Nam  omnia  propter  vos.  Nunc  se  non  tantum  in  spe  futurae  beatitudinis,  sed  in  ipsis  etiam  afflictionibus  Corinthiis  coniungit,  in  quibus  videbantur  esse  maxime  diversi:  se  enim  affligi  in  ipsorum  bonum  docet.  Unde  sequitur,  merito  eos  partem  debere  in  se  transferre.  Pendet  hoc,  quod  dicit  Paulus,  primum  ex  arcana  communione,  quam  habent  inter  se  Christi  membra,  sed  praecipue  ex  mutua  ratione  et  necessitudine,  quae  inter  ipsos  vigere  peculiariter  debebat.  Iam  admonitio  haec  perquam  utilis  erat  Corinthiis  et  consolationem  eximiam  secum  trahebat.  Cuius  enim  consolationis  est,  quum  Deus  imbecillitati  nostrae  parcens,  mollius  nos  tractat,  affligi  in  commune  omnium  bonum  eos,  qui  praestantiori  virtute  instructi  sunt?  Admonebantur  etiam  ut,  quum  aliter  iuvare  Paulum  nequirent,  precibus  saltem  eum  sublevarent  et  commiseratione.  Ut  gratia,  quae  abundaverit.  Consensum  illum  membrorum  Christi  iam  commendat  a  fructu,  qui  inde  oritur  :  nempe  quod  valet  ad  propagandam  Dei  gloriam.  Per  gratiam  metonymice  more  usitato  intelligit  beneficium  illud  liberationis,  cuius  supra  meminerat:  quod  dum  opprimebatur,  non  erat  tamen  anxius:  inopia  laborans,  non  destituebatur  ete.  Denique  perpetuam  adversus  omne  maiorum  genus  liberationem.  Hanc  gratiam  dicit  exundare:  quo  significat,  non  penes  se  inclusam  esse  ut  solus  ea  fruatur,  sed  latius  diffundi,  nempe  in  Corinthios,  quibus  multum  proderat.  Quum  doni  Dei  exuberantiam  in  gratitudine  constituit,  in  autoris  gloriam,  admonet,  nostra  ignavia  perire  quidquid  in  nos  bonorum  confert  Deus,  nisi  ad  gratias  agendas  prompti  et  alacres  simus.