5:569  ACTES  DE  RATISBONNE.  De  ee  mesme  poinct  on  peult  entendre,  que  le  corps  n'est  pas  attache  avec  le  pain  materiel,  pour  la  demeurer  iusque  a  tant  qu'on  le  mange.  Car  il  ne  faict  pas,  comme  il  a  este  dict,  en  union  naturelle  des  deux  substances:  mais  quand  aux  fideles,  le  corps  est  conioinct  avec  le  pain,  affin  qu'en  usant  du  signe  ilz  participent  a  la  verite:  et  n'ayent  pas  seulement  une  figure  corruptible  et  vaine:  mais  aussi  receoyvent  ce  qui  y  est  represente.  Mais  le  mal  est  que  ce  mot  de  consecration  n'est  pas  sainement  entendu.  Car  le  monde  imagine,  que  le  pain  receoyve  la  vertu  des  parolles  en  soymesme,  [fol.  68]  affin  que  quand  les  parolles  sont  pronuncees,  le  corps  de  Iesus  Christ  y  entre:  ou  au  contraire  la  parolle  de  Dieu  ne  se  addresse  pas  au  pain,  affin  qu'il  change  sa  nature,  mais  a  ceux  qui  doyvent  recevoir  le  Sacrement,  affin  qu'ilz  entendent  que  ce  n'est  pas  un  signe  pur,  mais  conioinct  avec  sa  verite.  Et  c'est  ce  que  dict  sainct  Augustin,  que  la  parolle  qui  faict  le  Sacrement  ??c'est  la  parolle  de  foy,  que  on  nous  presche.  Pour  ceste  cause,  il  est  trop  difficile  de  garder  le  Sacrement  comme  on  a  faict,  le  tenant  dedans  le  ciboire,  sans  superstition.  Car  ce  qu'on  allegue,  que  c'est  pour  les  malades:  la  response  est  facile,  que  si  le  mystere  ne  leur  est  expose,  c'est  un  abuz.  Et  s'il  leur  est  expose,  cela  est  la  vraye  consecration.  Ainsi  c'est  chose  superflue  de  le  reserver.  D'avantage  le  peuple  ne  se  peult  tenir  de  l'adorer,  comme  s'il  estoit  la  mis  seulement  pour  ceste  cause.  Touchant  de  le  porter  en  pompe,  et  en  user  aultrement  que  nostre  Seigneur  ne  l'a  ordonne,  c'est  superstition  et  mesme  ydolatrie.  De  ce  qui  est  dict  au  second  article  du  chapitre  de  Penitence  9  qu'il  fault  confesser  les  pechez  mortes  dont  l'homme  se  sent  coulpable  et  qui  tiennent  la  conscience  perplexe.1)  De  ceste  partie  nous  respondons,  qu'il  fault  retenir  en  l'Eglise  le  ministere  de  l'Absolution  particuliere.  Qui  est  la  voix  de  l'Evangile,  sonante  en  la  bouche  des  Ministres,  pour  nous  applicquer  la  remission  de  noz  pechez.  Ce  benefice  est  iresaggreable  aux  consciences  timides,  lesquelles  sont  par  ce  moyen  confermees,  pour  se  resouldre,  que  l'Evangile  promet  non  seulement  a  tous  en  general,  mais  en  prive  a  un  chascun  la  remission  des  pechez,  et  applicque  la  promesse  de  Iesus  Christ.  Ceste  consolation  est  necessaire  a  ceux  qui  ont  a  batailler  contre  les  terreurs  et  espouvantemens  de  leur  conscience.  Cependant  neantmoins  il  est  de  besoing,  que  1)  Lettre  O.  Voyes  ci-dessus  page  542.