40:568  Excusant  rursus  Chaldaei,  quod  non  possint  regi  suum  somnium  narrare.  Dicunt  in  summa,  hoc  non  esse  proprium  suae  artis  vel  scientiae:  deinde  nullo  exemplo  fuisse  hoc  proditum,  ut  interrogarentur  sapientes  in  hunc  modum,  nempe  ut  responderent  tam  de  facto,  quam  de  iure,  ut  loquuntur.  Iactabant  quidem  se  somniorum  esse  interpretes:  sed  coniecturae  eorum  non  poterant  extendi  usque  ad  ipsa  somnia:  sed  tantum  ad  interpretationem  spectabant.  Erat  quidem  haec  iusta  excusatio:  sed  non  admittitur  a  rege,  qui  furore,  sicuti  heri  dictum  fuit,  impellitur,  idque  non  sine  arcano  Dei  instinctu,  ut  pateat  magos,  et  ariolos,  et  astrologos  meros  esse  impostores,  qui  illuserant  populo.  Et  finis  semper  nobis  observandus  est,  quia  voluit  Deus  extollere  servum  suum  Danielem,  et  a  vulgari  ordine  ipsum  eximere.  Addunt  etiam  nullos  unquam  reges,  vel  principes  ita  egisse  cum  magis  et  sapientibus.  Postea  sequitur,  11.  Et  sermo  de  quo  rex  inquirit  pretiosus  est  (vel,  rarus):  et  nullus  est  qui  possit  exponere  coram  rege,  nisi  dii,  quorum  habitatio  cum  carne  non  est  ipsis  (sunt  multa  verba  supervacua,  ut  lingua  illa  fert).  Addunt  rem  hanc  de  qua  rex  sciscitatur  excedere  captum  humani  ingenii.  Non  dubium  est  quin  aegre  hoc  confessi  fuerint,  quia,  ut  antehac  dictum  fuit,  acquisierant  sibi  famam  tantae  sapientiae,  ut  vulgus  putaret  nihil  eos  latere,  vel  esse  ipsis  incognitum.  Quod  ergo  fatentur  inscitiam  hac  in  parte,  non  dubium  est  quin  libenter  refugissent:  sed  necesse  fuit  in  extremo  discrimine  quaerere  etiam  hoc  subterfugium.  Porro  dubitari  hic  potest,  cur  dicant  sermonem,  de  quo  rex  sciscitatur,  esse  pretiosum.  Nesciunt  enim  quid  rex  somniaverit.  Unde  igitur  hoc  pretium?  Sed  non  mirum  est,  homines  anxios,  et  perculsos  etiam  extrema  formidine  quidvis  effutire  sine  iudicio.  Dicunt  igitur  rem  hanc  esse  pretiosam,  nempe  miscent  hanc  adulationem  aliis  excusationibus,  ut  mitigent  iracundiam  regis,  atque  ita  effugiant  praesentem  mortem,  quae  iam  instabat,  Sermo  ergo  de  quo  rex  inquirit  pretiosus  est:  et  tamen  fuit  hoc  etiam  dictu  probabile,  quia  res  erat  non  vulgaris,  somnium  divinitus  immissum  esse  regi,  postea  sepultum  fuisse  subita  oblivione.  Oportuit  igitur  esse  mysterium  aliquod:  et  ideo  non  sine  colore  dixerunt  Chaldaei,  negotium  hoc,  vel  rem  hanc.  superare  sua  magnitudine  communem  ingenii  humani  modum:  ideo  adiiciunt  non  posse  alios  esse  interpretes,  quam  deos  vel  angelos.  Quidam  hoc  ad  angelos  referunt.  Sed  scimus  multitudinem  deorum  fuisse  cultam  inter  illos  magos.  Ergo  simplicius  est  hoc  exponere  de  illa  deorum  turba,  quam  imaginabantur.  Habebant  quidem  mi-