35:568  tant  de  benefices  qu'il  nous  eslargit.  Car  toute  nostre  vie  se  doit  rapporter  (comme  desia  nous  avons  touche  a  ce  but  la,  que  nous  benissions  Dieu,  et  que  nous  rendions  tesmoignage  que  ses  benefices  n'ont  point  este  perdus  envers  nous,  comme  ils  seroyent  si  nous  estions  comme  muets.  Voyla  donc  ce  que  nous  avons  a  observer,  que  Ezechias,  en  disant  que  les  vivans  loueront  Dieu,  a  voulu  noter  que  les  hommmes  pervertissent  l'ordre  de  nature,  quand  ils  ne  s'applicquent  point  a  louer  Dieu,  et  que  leur  ingratitude  n'est  nullement  excusable,  quand  ils  ensevelissent  les  graces  de  Dieu,  et  les  mettent  en  oubli.  Puis  qu'ainsi  est  donc  que  nostre  Seigneur  ne  cherche  de  nous  sinon  que  son  Nom  soit  glorifie  en  ce  monde,  il  ne  se  faut  point  esbahir  si  Ezechias  dit,  Le  vivant,  le  vivant  louera  Dieu.  Et  mesmes  il  nous  faut  aussi  noter  quelle  difference  il  y  a  entre  la  condition  des  vivans  et  des  morts.  Encores  que  les  morts  louent  Dieu,  si  est-ce  que  nous  ne  pouvons  pas  iuger  n'imaginer  qu'ils  soyent  assemblez  a  nostre  facon,  afin  de  monstrer  un  accord  de  leur  foy.  Chacun  d'eux  pourra  bien  louer  Dieu  en  son  endroit,  et  cependant  ce  n'est  pas  qu'ils  soyent  recueillis  en  un  corps,  comme  nous  sommes  maintenant,  car  l'Escriture  ne  dit  rien  de  cela.  Et  il  ne  faut  point  que  nous  forgions  a  nostre  teste  des  fantasies  comme  bon  nous  semblera.  Car  nous  scavons  que  Dieu  reserve  au  dernier  iour  ceste  perfection,  que  nous  soyons  tous  unis,  et  que  nous  soyons  tellement  conioints  a  nostre  Dieu,  que  sa  gloire  reluise  plenement  en  nous.  D'autant  donc  que  les  trespassez  n'ont  pas  une  telle  facon  de  s'exercer  a  louer  Dieu  comme  nous:  voyla  pourquoy  il  est  dit  que  c'est  une  chose  qui  appartient  proprement  a  nous  vivans.  Mais  il  y  a  encores  d'avantage,  car  Ezechias  ne  parle  pas  yci  simplement  de  la  mort,  selon  que  nous  en  avons  touche  desia,  mais  il  qualifie  sa  mort,  comme  s'il  eust  este*  retranche  de  l'Eglise  de  Dieu,  et  de  toute  esperance  de  salut,  quand  ce  iugement  fust  venu  a  estre  execute,  ou  bien  comme  s'il  eust  este  devant  son  Iuge.  Ezechias  donc  ne  s'apprestoit  pas  a  mourir,  comme  de  nature  nous  ne  pouvons  fuir  ceste  necessite,  mais  il  avoit  ce  tesmoignage  de  l'ire  de  Dieu,  duquel  il  estoit  autant  effraye  comme  si  tout  eust  este  perdu  pour  luy.  Or  nous  scavons  que  nul  ne  peut  chanter  les  louanges  de  Dieu,  sinon  qu'il  en  ait  occasion  et  matiere,  car  quand  nostre  Seigneur  nous  monstre  une  face  terrible,  nous  avons  la  bouche  close,  nous  sommes  saisis  de  telle  angoisse  qu'il  est  impossible  que  nous  le  benissions:  plustost  au  contraire  il  n'y  aura  que  grincement  de  dents  quand  l'ire  de  Dieu  nous  aura  ainsi  estonnez.  Voila  comme  en  estoit  Ezechias.  A  l'opposite,  quand  Dieu  se  monstre  propice  envers  nous,  et  qu'il  nous  monstre  quelque  signe