9:567  567  RESPONSIO  568  lans:  quum  longo  ante  tempore  praedam  [pag.  7]  hanc  apud  Cassandrum  venatus  esset.  Adde  quod  is  qui  Coloniae  tot  annos  in  sterquilinio  suo  ad  hunc  usque  diem  iacuit,  ac  si  in  medio  Galliae  sinu  degeret,  deplorat  turbulentum  regni  statum.  Quorsum  haec  tam  putida  fabula?  Et  quis  tam  obtusus  est,  qui  non  Balduini  penicillum  agnoscat?  Nullo  certe  unquam  atramento  hoc  quidquid  est  delebit.  Haec  enim  probi  hominis  et  ingenui  excusatio,  dum  histrionis  in  morem  querulando  lacrymas  stultis  vult  elicere.  Quum  in  intima  essem  Gallia,  inquit,  quidam  in  extremis  Germaniae  finibus,  qui  de  Gallia  neque  sciebat  neque  cogitabat  quidquam,  libellum  composuit  et  edidit.  Quid  ergo  sibi  vult  querimonia,  in  qua  Galliae  turbas  deplorat  ille  quisquis  est  libelli  autor?  Iam  quid  attinet  Coloniam  Agrippinae  locare  in  ultimo  aliquo  Germaniae  recessu?  ut  taceam  de  intima  Gallia,  quum  emisso  aculeo  Rhemos  se  contulerit  ad  venditandas  Cardinali  suas  operas.  Porro  quum  duplicem  quaestionem  agitandam  esse  praefatus  sit,  Facti,  an  ipse  librum  composuerit,  et  Iuris,  an  dignus  sit  liber  tam  acerba  insectatione:  [pag.  8]  quam  feliciter  priorem  partem  expediat  penes  lectores  esto  iudicium:  nempe  libelli  culpam,  cuius  autor  non  est,  immerito  in  se  transferri.  Infitiando  se  purgat.  Si  volet  adiungat  et  periurium  quo  me  temeritatis  reum  faciat:  quia  de  re  incerta  libere  pronunciare  ausus  fuerim.  Ego  vero  rem  totam  de  qua  trepide  balbutit,  ingenue  et  familiariter  aperio:  nec  invidia  onerari  volo,  quantum  res  patitur.  Editum  est  scriptum  quod  mihi  notam  infamiae  apud  omnes  aspergeret:  suppressum  est  autoris  et  typographi  nomen  data  opera,  ut  impune  me  lacerare  liberum  esset.  Excusat  Balduinus  opus  non  esse  suum.  Ut  hoc  illi  concedam:  quando  proxeneta,  vel  leno  et  productor  fuit,  denique  libellum  tradidit  manu  sua,  et  vulgandum  curavit,  eiusdem  criminis  reus  tenetur.  Si  in  ius  eum  accerserem,  tribus  verbis  finita  esset  causa.  Quanta  vero  sit  iniuriarum,  quibus  me  vulnerare  conatus  est  ille  scriptor,  atrocitas  non  commemoro:  quia  mihi  privatim  nihil  exprobrat.  Sed  quum  nihil  sibi  posset  fidei  acquirere,  nisi  quantum  mihi  abrogasset,  quidquid  hactenus  pro  defensione  coelestis  [pag.  9]  doctrinae  laborum  sustinui,  quidquid  studii  et  diligentiae  impendi  in  asserendo  Dei  cultu,  maligne  calumniando  me  facit  violentae  sectae  ducem:  quae  totam  ecclesiam  pessumdare  malit,  quam  ex  sua  pertinacia  minimum  cedere.  Dissidia  quibus  nunc  ecclesia  misere  laceratur  bello  civili  comparat.  Tanto  nos  flagrare  odio  adversae  partis  fingit,  ut  neglecta  sanandi  cura  tantum  ad  perdendum  feramur.  Ac  huius  quidem  maledicti  facilis  est  refutatio,  quibus  cordi  est  simplex  veritas  indigne  gravari,  quia  non  claudicent  in  utramque  partem.  Sed  posthabita