25:567  567  COMMENTARIUS  IN  IOSUE  CAP.  XXIV.  568  obstaculo  superato,  intrepide  respondent,  se  in  officio  constantes  fore.  Denique  non  deterret  eos  Iosue,  quominus  Deo  serviant:  sed  tantum  quam  refractarii  sint  ac  immorigeri  exponit,  ut  ingenium  mutare  discant.  Sic  Moses  in  cantico,  quum  videtur  divortium  inter  Deum  et  ipsos  facere,  nihil  aliud  quam  eos  pungit  et  acuit,  ne  sui  similes  esse  pergant.  Simpliciter  quidem  ratiocinatur  Iosue  a  Dei  natura:  sed  praecipue  stylum  stringit  in  perversos  mores,  et  indomitam  contumaciam  populi.  Pronunciat  Deum  esse  sanctum,  et  zelotem.  Id  certe  ab  eius  cultu  homines  minime  prohiberet:  sed  hinc  sequitur,  impuris,  sceleratis,  profanisque  eius  contemptoribus,  et  quibus  nulla  religio  est  eius  iram  provocare,  nihil  esse  cum  eo  negotii,  quia  implacabilem  sentient.  Caeterum  ubi  dicitur  non  parsurus  eorum  sceleribus,  non  statuitur  generalis  regula:  sed  dirigitur  ad  immorigeros  homines  sermo,  ut  saepe  alias.  Neque  etiam  agitur  de  quibuslibet,  vel  specialibus  delictis,  sed  de  crassa  Dei  abnegatione,  sicuti  proximus  versus  demonstrat.  Ideoque  liberius  respondet  populus  se  fore  Dei  cultorem.  22.  Dixitque  Iosue.  Nuno  tenemus  in  quem  hactenus  scopum  collimaverit  Iosue:  non  ut  populus  metu  exanimatus  a  religione  excideret:  verum  ut  sanctior  esset  obligatio,  ex  quo  ultro  appetiverant  eius  imperium,  in  eius  fidem  ac  clientelam  se  contulerant,  ut  degerent  sub  eius  patrocinio.  Se  ergo  propria  conscientia  perfidiae  reos  ac  convictos  fore  agnoscunt  nisi  fidem  praestiterint.  Etsi  autem  non  simulate  professi  sunt  se  ad  sui  damnationem  fore  testes:  quam  leviter  tamen  elapsa  sit  huius  promissionis  memoria  patet  ex  libro  Iudicum.  Nam  mortuis  senioribus  celeriter  ad  varias  superstitiones  distracti  sunt.  Quo  exemplo  docemur  quam  multiplices  fallaciae  occupent  hominum  sensus,  et  quam  flexuosi  recessus  hypocrisin  et  vanitatem  occultent,  dum  se  ipsos  vana  fiducia  decipiunt.  23.  Nunc  ergo  auferte.  Qui  fieri  potest  ut  nuper  tam  rigidi  superstitionis  vindices  idolis  apud  se  locum  dederint?  et  tamen  id  verba  sonant,  ut  e  medio  sui  auferant  deos  extraneos.  Si  recipimus  domos  eorum  adhuc  fuisse  pollutas  idolis,  quasi  in  illustri  speculo  cernere  licet,  ut  suaviter  sibi  maior  pars  hominum  indulgeat  in  vitiis,  quae  inexorabili  severitate  contra  alios  persequitur.  Sed  quia  verisimile  mihi  non  est  post  caedem  Achan  ausos  fuisse  manifestis  sacrilegiis  se  polluere,  libenter  ad  eorum  affectum  refero,  ut  procul  omnia  falsorum  deorum  figmenta  a  se  abigant.  Nam  ante  hoc  eodem  capite  hortatus  est,  ut  auferrent  deos  quibus  servierant  patres  ipsorum  trans  flumen,  et  in  Aegypto.  Atqui  nemo  putabit  idola  Chaldaeae  reposita  fuisse  in  eorum  sacrariis,  vel  etiam  secum