9:566  optimum  remedium  afferret.  Huic  opposita  fuit  brevis  refutatio,  in  qua  perstrictus  fuit  Balduinus.  Hac  occasione  nunc  me  aggreditur,  et  ad  capitale  iudicium  vocat,  vel  potius  trahit,  ac  si  iniuste  a  me  traductus  foret.  Quid  vero  si  negem  libellum,  cui  tam  ardenter  infestus  est,  a  me  scriptum?  Et  certe  si  cavillari  libeat,  negare  promptum  est.  Quia  tamen  magna  ex  parte  ex  meo  sermone  fuit  exceptus,  pro  meo  agnoscam.  Hic  velis  expansis  in  me  Balduinus  invehitur,  seque  falsa  calumnia  gravari  conqueritur  :  et  quanquam  autorem  non  nominat,  alienum  tamen  opus  dicit  immerito  sibi  ascribi.  Ego  autem  eum  libenter  adiuvo,  ac  testatum  volo  esse  lectoribus,  naenias  illas  non  ab  uno  consarcinatas  fuisse.  Est  Cassander  quidam  ab  hominum  consuetudine,  ut  aiunt,  remotus.  Nec  unquam  innotuisset  eius  nomen,  nisi  Balduini  impulsu  nunc  a  me  productus  esset  in  theatrum.  Is  ex  solitudine  αὐθάδειαν,  ut  fieri  solet,  ita  contraxit,  ut  omnes  fere  eius  sensus  obstupefecerit  morositas.  Quoniam  olfecerat  [pag.  6]  Balduinus  illum  viginti  annorum  otio  ad  mediam  quandam  et  flexuosam  religionem  cudendam  abusum  esse,  ex  eius  sinu  infausta  illa  commenta  facile  elicere  potuit:  quae  lucem  tenebris  miscendo  sub  pestiferae  concordiae  praetextu  omnes  in  ecclesia  corruptelas  foverent.  Vix  enim  credibile  est  quanta  sagacitate  quidquid  pietati  noxium  est  investiget.  Qualiscunque  autem  erat  illa  farrago,  eam  suo  artificio  polivit.  Nam  si  quis  roget  cur  nulla  in  Refutatione  facta  fuerit  Cassandri  mentio,  respondeo  nullam  fuisse  rationem,  cur  lamia  illa,  vel  larva,  e  suo  antro,  ubi  hactenus  bene  latuit,  extrahi  deberet.  Verum  quia  passim  Balduinus  non  obscuras  styli  sui  notas  libello  impresserat,  ut  omnibus  conspicuum  esset  non  nisi  ex  eius  manu  prodiisse  (nec  typographus  negaret),  ac  quicunque  mediocri  praediti  erant  iudicio  idem  sentirent  ac  loquerentur:  oblique  eum  perstringere  qui  libellum  vulgando  venenum  ex  clausa  pyxide  effuderat,  nulla,  opinor,  vetabat  religio  vel  aequitas.  Atque  hic  crassi  mendacii  convictus  tenetur,  se  totius  rei  inscium  fuisse  simu-  36*