32:566  a  une  autre  tentation  outre  celle  que  nous  avons  desia  veue.  Desia  c'est  un  combat  bien  rude  et  bien  difficile  a  supporter,  quand  les  meschans  se  viennent  mocquer  de  nous,  comme  si  Dieu  nous  avoit  trompe,  comme  si  nous  avions  este  trop  simples  et  trop  sots  de  nous  fier  en  luy.  Voyla  un  grand  trouble  pou*  les  povres  infirmes,  voire  et  tel  qu'il  faut  (pour  le  moins)  qu'ils  en  soyent  esmeus  et  espouvantez.  Mais  ceste  tentation  n'est  pas  moindre  a  surmonter,  quand  nous  voyons  que  tout  le  monde  se  desbauche,  que  tout  ce  qu'on  fait,  est  comme  si  on  avoit  conspire,  et  fait  un  complot  de  provoquer  l'ire  de  Dieu,  de  le  desfier,  de  reietter  toutes  ses  graces,  et  les  foller  au  pied.  Quand  donc  nous  voyons  les  hommes  s'aliener  ainsi  de  Dieu,  iusqu'a  entrependre  guerre  ouverte  a  l'encontre  de  luy,  il  est  bien  difficile  que  nous  n'en  soyons  comme  effarouchez.  Tant  y  a  neantmoins,  que  David  proteste,  que  tant  s'en  faut  qu'il  se  soit  desbauche  voyant  les  corruptions  telles  par  tout,  qu'il  a  eu  horreur  de  voir  les  meschans  qui  delaissoyent"  ainsi  la  Loy  de  Dieu.  Par  quoy,  apprenons  d'estre  saisis  de  cest  horreur-cy  toutes  fois  et  quantes  que  les  hommes  se  desborderont  a  mal:  apprenons,  di-ie,  de  nous  retirer  a  Dieu,  et  en  nous  recueillant  comme  en  nos  esprits,  que  nous  concevions  un  horreur  voyans  de  tels  monstres,  et  des  choses  ainsi  contre  nature.  Si  ceste  doctrine  a  iamais  este  necessaire,  elle  l'est  auiourd'huy:  car  regardons  un  peu  quelles  sont  les  confusions  par  tout.  Quand  nous  regarderons  ce  qui  ce  fait  entre  les  Papistes,  il  y  a  un  desbordement  plus  qu'infernal.  Entre  nous,  Helas!  ou  la  parole  de  Dieu  devroit  bien  avoir  plus  de  vertu,  encores  voit-on  comme  la  pluspart  non  seulement  desguiseront  la  Loy  de  Dieu,  mais  ne  demanderont  sinon  de  l'abolir  du  tout.  Qu'est-il  de  faire  donc?  ce  n'est  point  assez  que  nous  n'ensuyvions  point  les  meschans  en  leur  impiete,  et  ne  nous  conioignions  avec  eux  pour  estre  leurs  complices:  mais  que  nous  en  ayons  horreur,  quand  nous  cognoissons  qu'ils  perissent  comme  miserables  creatures:  que  pour  cela  nous  soyons  tormentez  et  angoissez:  et  beaucoup  plus  quand  nous  voyons  Qu'ils  font  la  guerre  a  Dieu,  car  ce  sont  choses  par  trop  monstrueuses  de  voir  les  hommes  mortels  s'eslever  ainsi  contre  leur  createur,  et  batailler  a  l'encontre  de  luy  a  leur  escient.  Voyla  donc  ce  qui  est  yci  monstre  par  l'Esprit  de  Dieu  sous  l'exemple  de  David.  Et  en  cela  voyons  nous  si  nous-nous  devons  couvrir  de  telles  ordures,  voire  et  si  enormes,  quand  il  est  question  que  Dieu  soit  reiette,  que  sa  Loy  soit  aneantie:  si  nous  devons  faire  semblant  de  rien,  si  nous  devons  supporter  cela,  et  le  passer  comme  s'il  ne  nous  en  challoit.  Or  si  nous  en  faisons  ainsi,  36*