48:564  11.  In  navi  alexandrina.  His  verbis  significat  Lucas  vel  demersam  fuisse  priorem  navem,  vel  ita  disiectam  et  laceram,  ut  postea  usui  non  fuerit.  Unde  naufragii  gravitas  melius  cognoscitur.  Diserte  autem  narrat  navi  alexandrinae,  qua  Romam  vecti  sunt,  insigne  fuisse  Castoris  et  Pollucis,  ut  sciamus  minime  datam  fuisse  optionem  Paulo  ut  cum  sui  similibus  navigaret:  sed  coactum  fuisse  ingredi  in  navem,  quae  duobus  idolis  dicata  erat.  Castorem  et  Pollucem  veteres  poetae  finxerunt  ex  Iove  et  Laeda  fuisse  genitos:  unde  et  Sioaxoupoi  graece  vocati  sunt:  qua  voce  hic  usus  est  Lucas:  quasi  dicas  Iovis  filios.  Deinde  fabulati  sunt  illos  esse  geminos  in  zodiaco.  Alia  quoque  superstitio  inter  nautas  invaluit,  exhalationes  igneas,  quae  in  tempestatibus  se  ostendunt,  eosdem  esse  illos.  Itaque  dii  marini  olim  crediti  sunt  et  invocati:  sicut  hodie  Nicolaus  et  Clemens,  et  similes.  Imo  ut  in  papatu  mutatis  tantum  nominibus  retenti  sunt  vetusti  errores  :  hodie  exhalationes  illas  sub  nomine  sancti  Hermis,  vel  sancti  Ermi  adorant.  Quoniam  autem  si  una  exhalatio  solitaria  appareat,  triste  praesagium  est:  geminae  autem,  ut  ait  Plinius,  salutares  et  prosperi  cursus  praenunciae:  ut  Castorem  et  Pollucem  alexandrini  nautae  sibi  haberent  propitios,  utriusque  insigne  in  navi  posuerunt.  Ergo  quantum  ad  ipsos  spectat,  navis  impio  sacrilegio  polluta  erat:  sed  quia  eam  non  sponte  sibi  delegit  Paulus,  nihil  inquinamenti  inde  contrahit.  Et  certe  quum  idolum  nihil  sit,  inficere  Dei  creaturas  non  potest,  quin  pure  et  licite  illis  utantur  fideles.  Et  omnino  sic  habendum  est:  non  aliter  quam  pura  conscientia  elui  quascunque  suis  praestigiis  sordes  Dei  creaturis  Satan  aspergere  conatur,  quum  impii  et  scelerati,  quae  per  se  pura  sunt,  immundo  contactu  coinquinent.  Denique  non  magis  Paulum  contaminavit  huius  navis  ingressus  quam  conspectus  altarium  Athenis:  quia  omni  superstitione  purus  et  solutus  satis  tenebat  meras  esse  illusiones  omnia  gentium  sacra.  Deinde  nulla  apud  homines  suspicio  consensus  esse  poterat  in  profanum  illum  errorem.  Nam  si  quis  Pollucis  et  Castoris  cultus  fuisset  simulandus,  centum  mortes  oppetere  maluisset.  Ergo  quia  nulla  metuebatur  offensio,  navem  libere  conscendit.  Neque  tamen  dubium  est  quin  dolenter  et  cum  gemitu:  quia  videbat  inanibus  figmentis  tribui  Dei  honorem.  Ideo  inter  eius  exercitia  hoc  enumerandum  est,  quod  duces  habuit  itineris,  qui  se  ab  idolis  gubernari  putabant,  et  navem  commiserant  eorum  tutelae  ac  praesidio.  12.  13.  14.  Quum  venissemus  Syracusas.  Reliquum  navigationis  cursum  Lucas  persequitur,  quod  in  Siciliam  primum  appulerint.  Deinde  oblique  propter  aestum  maris  traiecerint  in  Italiam.  Sicuti  autem  celeberrimus  est  Siciliae  portus  quem  hic  ponit  Lucas:  ita  longius  a  litore  Italico  quam  portus  Messanae,  cui  oppositum  est  Rhegium,  cuius