40:564  gare  supplicium  minatur,  sed  dicit  futuros  in  frusta,  si  tamen  recipimus  illam  sententiam,  ut  Haddamin  significet  frusta.  Si  simpliciter  accipimus  pro  sanguine,  idem  erit.  Haec  regis  iracundia  plane  furiosa  est  :  imo  superavit  Nabuchadnezer  hac  in  parte  omnem  ferarum  saevitiam.  Quaenam  enim  culpa  potuit  Chaldaeis  imputari,  si  non  tenerent  regis  somnium?  Nunquam  professi  hoc  fuerant,  quemadmodum  postea  videbimus:  nemo  rex  unquam  flagitaverat  quod  est  supra  hominum  facultatem.  Videmus  ergo  in  rege  fuisse  belluinam  rabiem,  quum  mortem,  imo  crudele  supplicium  denuntiavit  magis  et  ariolis.  Tyranni  quidem  saepe  ita  laxant  fraena  suae  libidini,  ut  quidvis  sibi  licere  existiment:  unde  etiam  illae  voces  apud  Tragicos,  Quod  libet,  licet.  Et  non  abs  re  etiam  Sophocles  dicit  abiiciendam  esse  libertatem,  ubi  quis  ingreditur  limen  tyranni  :  sed  si  quis  colligat  omnia  exempla,  vix  reperiet  unum  aliquod  tale.  Sequitur  ergo  diabolico  furore  impulsum  fuisse  regis  animum,  ut  vellet  poenam  exigere  ex  Chaldaeis,  qui  tamen  erant  innoxii,  quantum  ad  ipsum  spectat.  Scimus  fuisse  impostores,  scimus  mundum  fuisse  delusum  eorum  imposturis,  denique  scimus  dignos  morte,  quemadmodum  etiam  capitale  crimen  erat  ex  praescripto  legis,  ubi  quis  praedictionem  sibi  vendicabat  ex  magicis  artibus.  Sed  quantum  ad  regem  spectat,  nullum  crimen  potuit  in  illis  deprehendi.  Cur  ergo  mortem  illis  minatur?  nempe  quia  Dominus  voluit  illustrare  hoc  modo  miraculum,  de  quo  postea  videbimus.  Nam  si  rex  passus  fuisset  Chaldaeos  discedere,  statim  etiam  poterat  sepelire  curam  illam,  quae  animam  eius  angebat  et  cruciabat.  Res  etiam  minus  fuisset  nota  in  populo.  Deus  ergo  semper  torquet  regis  animum,  ita  ut  praeceps  ruat  in  furorem,  quemadmodum  diximus.  Deinde  haec  tam  atrox  et  saeva  denuntiatio  debuit  omnes  expergefacere.  Neque  enim  dubium  est  quin  summi  et  infimi  trepidaverint,  quum  audirent  tantum  fuisse  iracundiae  ardorem  in  rege.  Haec  igitur  summa  est,  et  notandus  est  finis  providentiae  Dei,  cur  ita  voluerit  regem  excandescere  sine  ullo  modo.  Sequitur,  6.  Et  si  somnium  et  interpretationem  eius  indicaveritis,  donum,  et  munus,  et  honorem  (vel,  pretium)  magnum  accipietis  a  facie  mea  (hoc  est  a  me),  propterea  somnium  et  interpretationem  eius  indicate  mihi.  Hic  rex  ex  opposito  studet  eos  allicere  spe  lucri,  ut  attenti  sint  ad  narrandum  somnium.  Ergo  ab  una  parte  horrorem  illis  incutit,  ut  etiam  ab  invitis  extorqueat  somnii  narrationem  cum  interpretatione.  Interea  vero  si  possint  blanditiis  adduci,  etiam  ipsos  hoc  artificio  tentat.  Promittit  enim  donum  et  munus  et  honorem,  hoc  est,  promittit