35:564  dit  que  par  cela  nous  voyons  quelle  est  nostre  iustice,  et  que  David  en  a  fait  un  brief  sommaire.  Pour  ceste  cause  donc  le  diable  a  tousiours  tasche  par  subtils  moyens  de  divertir  les  hommes  de  cela,  afin  qu'ils  ne  cognussent  pas  quel  besoin  ils  ont  de  ceste  remission  des  pechez.  Comme  en  la  Papaute  nous  voyons  d'un  coste  qu'ils  disent  que  quand  Dieu  nous  pardonne  nos  pechez,  ce  n'est  sinon  qu'avec  repentance  et  confession,  et  puis  outre  cela,  qu'il  faut  encore  que  nous  apportions  quelque  recompense,  et  si  Dieu  nous  pardonne  la  coulpe,  qu'il  se  reserve  la  punition  comme  Iuge:  et  que  ce  seroit  deroguer  a  sa  maieste  si  nous  disions  qu'il  pardonnast  a  pur  et  a  plein,  et  qu'il  faut  que  tousiours  il  monstre  quelque  rigueur  avec  sa  misericorde,  et  qu'autrement  ce  seroit  le  despouiller  de  sa  nature.  Voyla  comme  les  Papistes  ont  dispute  de  la  remission  des  pechez,  tellement  que  si  on  leur  dit  que  Dieu  nous  pardonne  nos  fautes  par  sa  pure  bonte,  cela  leur  est  comme  un  blaspheme.  Car  il  faut  (disent-ils)  que  nous  apportions  nos  satisfactions.  Et  quelles  sont-elles?  des  oeuvres  outre  mesure  que  nous  facions  plus  que  Dieu  ne  nous  commande  en  sa  Loy.  Il  est  vray  que  ce  sont  propos  execrables:  mais  quoy  qu'il  en  soit,  le  povre  monde  a  este  ainsi  enyvre  en  telles  sorcelleries.  D'autant  plus  donc  nous  faut-il  bien  noter  les  passages  ou  il  est  dit  que  Dieu,  en  nous  recevant  a  merci,  ne  veut  plus  entrer  en  conte  avec  nous,  comme  Ezechias  dit  yci.  Tu  as  mis  mes  pechez  derriere  le  dos.  Il  est  vray  que  Dieu  n'ha  point  de  dos  ne  d'estomach,  car  nous  scavons  que  son  essence  est  infinie  et  spirituelle,  mais  il  use  de  ceste  similitude  pour  signifier  qu'il  nous  pardonne  nos  pechez:  comme  aussi  quand  il  est  dit  qu'il  les  iette  au  profond  de  la  mer:  c'est  comme  s'il  n'en  vouloit  plus  avoir  memoire,  ne  qu'il  en  fust  parle,  ne  fait  mention  aucune.  Nous  voyons  donc  en  somme  quand  Dieu  nous  recoit,  tellement  qu'il  est  reconcilie  avec  nous,  que  ce  n'est  pas  seulement  pour  nous  pardonner  la  coulpe  (comme  les  Papistes  ont  imagine,  et  qu'ils  iargonnent  sans  propos)  mais  c'est  afin  de  nous  faire  sentir  sa  faveur  en  toutes  sortes,  et  de  ne  plus  nous  poursuyvre:  et  au  lieu  que  nous  estions  affligez  de  sa  main,  et  qu'il  nous  donnoit  par  cela  tesmoignage  de  son  ire,  qu'a  l'opposite  il  nous  fait  cognoistre  qu'il  nous  tient  comme  ses  enfans,  et  qu'il  nous  veut  traitter  tendrement,  monstrant  l'amour  qu'il  nous  porte.  Voyla  en  somme  ce  qu'Ezechias  a  voulu  dire,  usant  de  ceste  facon  de  parler,  que  Dieu  avoit  mis  tous  ses  pechez  derriere  le  dos.  Or  il  est  vray  que  souvent,  encores  que  Dieu  nous  ait  pardonne  nos  fautes,  il  ne  laissera  pas  de