25:564  eximitur  a  publici  erroris  culpa  quam  Thare  et  Nachor.  Quorsum  enim  dicitur  patres  populi  servisse  diis  alienis,  et  Abraham  inde  fuisse  ereptum,  nisi  ut  in  ipsis  primordiis  refulgeat  gratuita  Dei  misericordia?  Nam  si  reliquis  dissimilis  fuisset  Abraham,  eum  sua  pietas  discerneret.  Atqui  hoc  nominatim  agitur  ne  propria  dignitate  excellat  quae  obscuret  Dei  gratiam:  sed  ut  posteri  agnoscant  quum  esset  perditus,  excitatum  fuisse  a  morte  in  vitam.  Caeterum  fuit  hoc  incredibile  et  simile  portento,  quum  adhuc  superstes  esset  Noe,  non  modo  passim  in  mundo  grassatam  fuisse  idololatriam  :  sed  in  familiam  quoque  Sem  penetrasse,  in  qua  saltem  purior  vigere  debuerat  religio.  Certe  quantum  in  hac  parte  vesanus  et  indomabilis  hominum  sit  furor  inde  cognoscitur:  quod  sanctus  patriarcha,  cui  peculiaris  data  fuerat  Dei  benedictio,  fraenare  suos  posteros  non  potuerit,  quin  relicto  vero  Deo,  se  ad  superstitiones  prostituerent.  3.  Et  tuli  patrem.  Hoc  verbo  melius  confirmatur  quod  nuper  docui,  Abraham  non  propria  virtute  emersisse  ex  profunda  ignorantia  et  errorum  abysso,  sed  inde  manu  Dei  fuisse  eductum.  Neque  enim  dicitur  ultro  Deum  quaesiisse,  sed  fuisse  ab  eo  sumptus,  et  alio  traductus.  Beneficia  sua  amplificat  quod  in  longa  peregrinatione  mirabiliter  Abraham  incolumem  servaverit.  Unde  quod  sequitur  scrupulum  aliquem  parit,  quod  Deus  multiplicaverit  semen  Abrahae:  et  tamen  dederit  ei  solum  Isaac,  quia  non  nisi  eius  fit  mentio.  Sed  haec  comparatio  singularem  erga  eos  Dei  gratiam  illustrat,  quod  quum  numerosa  esset  alioqui  Abrahae  soboles,  solus  eorum  pater  gradum  legitimi  haeredis  tenuerit.  Eodem  sensu  mox  subiicitur,  quum  fratres  germani  et  gemelli  essent  Esau  et  Iacob  unum  ex  duobus  fuisse  retentum,  altero  praeterito.  Videmus  ergo  ut  magnifice  tam  in  persona  Ismael  et  fratrum,  quam  Esau,  Dei  clementiam  et  bonitatem  extollat  erga  Iacob,  ac  si  diceret  genus  eius  non  aliis  praecellere,  nisi  quia  sic  Deo  placuit.  4.  Iacob  autem  et  filii  eius.  Post  relegationem  Esau  narratur  descensus  Iacob  in  Aegyptum,  quia  tametsi  tantum  uno  verbo  attingitur,  amplam  tamen,  et  uberem,  et  luculentam  paterni  Dei  favoris  materiam  comprehendit.  Nec  vero  dubium  est,  quamvis  autor  libri  splendidis  elogiis  non  extollat  singula  miracula,  quin  tamen  summam  liberationis  quoad  sufficeret  exposuerit  Iosue  populo.  Primo  virtutes  designat  in  Aegypto  editas:  deinde  celebrat  transitum  maris  rubri,  ubi  illis  inaestimabili  potentia  opitulatus  erat  Deus.  Tertio  tempus  commemorat  quo  peregrinati  sunt  in  deserto.  8.  Postea  adduxi  vos.  Tandem  de  victoriis  disserere  incipit,  quae  viam  patefecerunt  ad  sedes  occupandas.  Etsi  enim  regio  trans  Iordanem  in  haereditate  promissa  non  fuerat:  ex  quo  tamen