35:563  563  TROISIEME  SERMON  564  mais  cependant  regarde-il  que  le  principal  bien  et  la  souveraine  felicite  des  hommes  c'est  qu'ils  soyent  reconciliez  a  Dieu?  Non:  cela  ne  vient  point  en  memoire.  Tant  plus  donc  nous  faut-il  retenir  ceste  doctrine,  la  ou  Ezechias  ne  dit  point  seulement,  Ie  suis  maintenant  debout,  et  Dieu  m'a  voulu  relever,  ma  vie  est  prolongee,  comme  il  a  dit  par  ci  devant:  mais  il  s'arreste  la  du  tout,  c'est  ascavoir,  Dieu  m'a  pardonne  mes  fautes,  il  m'a  receu  a  merci,  il  ne  m'impute  point  les  offenses  que  i'ay  commises  :  il  m'a  fait  une  telle  remission  que  maintenant  ie  luy  suis  agreable.  Il  ne  veut  plus  entrer  en  conte  avec  moy  comme  mon  Iuge:  car  il  a  oublie  tous  mes  pechez,  et  les  a  iettez  derriere  son  dos.  Voyla  donc  ou  Ezechias  nous  amene  par  son  exemple.  Et  ainsi,  toutes  fois  et  quantes  que  nous  serons  affligez  de  la  main  de  Dieu,  apprenons  d'entrer  tousiours  en  examen  de  nos  pechez:  et  quand  nous  demandons  a  Dieu  qu'il  nous  delivre,  que  nous  ne  mettions  point  la  charrue  devant  les  boeufs,  mais  que  nous  le  prions  qu'il  nous  recoyve  a  merci.  Et  combien  que  nous  ayons  desservi  mille  fois  plus  d'afflictions  qu'il  ne  nous  en  fait  endurer,  que  toutesfois  il  ne  laisse  point  de  nous  estre  propice:  et  quand  il  nous  aura  remis  au  dessus,  que  nous  luy  rendions  louanges,  non  seulement  du  bien  qu'il  nous  fait  selon  le  corps,  mais  de  ce  qui  est  beaucoup  plus  a  priser,  c'est  ascavoir  qu'il  a  oublie  toutes  nos  offenses,  et  qu'il  est  tellement  r'entre  en  grace  avec  nous,  qu'il  nous  accepte  comme  ses  propres  enfans,  pource  qu'il  destourne  sa  face  de  nos  pechez.  Car  cependant  que  Dieu  regarde  nos  pechez,  il  ne  peut  nous  regarder  qu'avec  desdain  et  n'y  a  que  toute  horreur.  Il  faut  donc  que  Dieu,  pour  nous  regarder  d'une  face  propice  et  favorable,  ait  premierement  oublie  nos  pechez,  et  qu'il  n'y  pense  plus.  Il  est  vray  que  quand  nous  parlons  ainsi  de  Dieu,  c'est  a  la  facon  des  hommes:  car  nous  scavons  que  tout  est  present  devant  Dieu.  Mais  quand  nous  disons  qu'il  faut  qu'il  oublie  nos  pechez,  qu'il  n'y  regarde  plus,  c'est  pour  exprimer  qu'il  ne  nous  en  veut  point  appeler  en  conte,  mais  qu'il  nous  aime  comme  si  iamais  nous  ne  l'avions  offense.  Au  reste,)  par  ceste  facon  de  parler  dont  use  Ezechias,  nous  voyons  quelle  est  la  remission  de  nos  pechez,  c'est  ascavoir  que  Dieu  les  iette  derriere  le  dos,  et  les  y  iette  en  telle  sorte  qu'il  ne  nous  en  punit  plus,  et  n'en  demande  nulle  vengeance:  et  ceci  est  bien  a  noter.  Car  le  diable  s'est  tousiours  efforce  d'obscurcir  ceste  doctrine,  pource  que  c'est  le  principal  poinct  de  nostre  salut:  et  (comme  il  nous  est  monstre  en  l'Escriture  saincte)  il  n'y  a  autre  iustice  ne  sainctete  que  ceste  remission  gratuite  des  pechez.  Bien  heureux  est  l'homme  (dit  David)  duquel  les  pechez  sont  pardonnez.  S.  Paul